BOBONARO, STLTIMORLESTE.com – Asosiasaun Halibur Defisiensia Rejiaun Oeste (AHADRO) husu ba Prezidente Republika, Jose Ramos Horta atu vizita sira iha Aldeia Tunubibi, Suku Tapo Memo Maliana, hodi haree direitamente kondisaun riil Ema ho Defisiensia sira iha fatin refere.
Diretor Ezekutivu AHADRO, Sebastiano Goveia de Fatima hatoo kestaun nee iha ambitu apoiu Parsela Natal husi Prezidente da Republika neebe oferese husi Apoiu sosiedade Presidensia Republika lidera husi Xefe Departementu Inventarizasaun Presidensia Republika, Simeão Goncalves Correia, iha Munisipiu Bobonaro, neebe apoia ai han nesesidade bazika ho mantal ba membru Asosiasaun Halibur Defisiensia Rejiaun Oeste (AHADRO) iha aldeia Tunubibi, Suku Tapo-Memo, Postu Administrativu Maliana hamutuk ema nain 18, Sabadu (08/11/2025).
“Hau nia rekomendasaun ba Sua Exelensia Prezidente da Republika, atu kontinua tau matan ba assosiasaun ema ho defisiensia nian, liu-liu ami AHADRO husu ba Prezidente da republika, Jose Ramos Horta, karik iha tempu ruma mai vizita ami, atu haree direitamente kondisaun riil neebe maka ami iha Munisipiu Bobonaro, aldeia Tunubibi, suku Tapo-Memo, Postu Administrativu Maliana. Ami kontente teb-tebes tanba iha mandatu PR Horta, konsege bolu ami nia maun Gaspar Afonso sai asesor prinsipal ba Xefe Estadu iha Palasiu Prezidensial durante tinan lima, Ema ho Defisiénsia (RhD) dahuluk assume knaar ida nee, atual Diretor Ezekutivu Asosiasaun Halibur Defisiénsia Matan Timor-Leste (AHDMTL), dehan Diretor Ezekutivu AHADRO, Sebastiano Goveia de Fatima.
Iha biban nee Diretor Ezekutivu AHADRO, Sebastiano Goveia de Fatima, hatoo benvindu ba ekipa sosiedade civil Prezidensia da Republika lidera husi Xefe Departementu Inventarizasaun Presidensia Republika, Simeão Goncalves Correia.
“Hau sente haksolok ho ita boot sira nia prezensa, apoiu neebe kiik ou boot, laharee ba nia kuantidade, importante maka ita nia relasaun organizasaun estadu ho organizasaun ema ho defisiensia nia linha koordenasaun diak tebes, tanba nee ami hatoo profunda ami nia ksolok tanba ohin ita boot sira lori parsela natal husi prezidente da republika, mai too ami AHADRO iha Maliana. Lori familia boot AHADRO hatoo obrigado barak ba Nai Prezidente da Republika no ami hatoo komprimentus ba Nai Prezidente Horta ho ekipa tomak husi Palasiu Presidensia, ami hatoo felis natal ba ita boot sira hotu, maske natal sedauk too, ami sente previleziu tanba Nai Prezidente da Republika apoiu ami,” dehan nia.
Asosiasaun nee ho nia funsionariu hamutuk ema nain 35 pesoas no Asosiasaun nee halibur ona ema ho defisiensia hamutuk 500-resin neebe akumula husi munisipiu Bobonaro, Likisa no Kovalima.
AHADRO eziste iha tinan 2015 oinsa fo advokasia ba ema ho defisiensia, liu-liu ba sira neebe hela iha area remota susar atu asesu informasaun, edukasaun, saude no seluk-seluk tan.
Iha biban nee, Xefe Departementu Inventarizasaun Presidensia Republika, Simeão Goncalves Correia dehan ohin mai iha nee, hodi entrega parsela natal ba maluk sira iha AHARDO.
“Ohin ita mai, entrega aihan nesesidade baziku ba maluk AHARDO iha nee, hanesan fos, mina, manta, manutolun, supermi no seluk tan, husu prezidente da Republika, Jose Ramos Horta, programa nee inisiativa PR nian neebe kada tinan sempre apoiu iha selebrasaun loron natal, ida nee hanesan parsela natal ba ita boot sira, kuantidade uitoan maibe ninia valor neee boot tebes, domin espesial husi Xefe Estadu ba ninia povu sira,” dehan Xefe Departementu Inventarizasaun Presidensia Republika, Simeão Goncalves Correia.
Nia dehan, apoiu ida nee laos deit ba AHARDO deit, maibe oferese apoiu nee hahu husi madre sira iha Munisipiu Likisa no ohin iha Munisipiu Bobonaro nomos sei kontinua tanba ba munisipiu sira seluk nudar domin husi Xefe Estadu ba povu iha ambitu selebrasaun loron boot natal tinan 2025.
Tuir observasaun STL iha ambitu apoiu parsela natal husi prezidente da Republika Jose Ramos Horta ba labarik sira neebe maka hamahan aan iha Orfonatu sira hahu husi Munisipiu Likisa too Bobonaro, ekipa Apoiu Sosiedade Civil presidensia da Republika antuziasmu tebes lori sasan nesesidade bazika no ropa too area remotas halao asaun karidade domin husi Xefe estadu ba labarik kiik oan sira iha loron boot natal tinan 2025.
Jornalista: Joseph Koa
Editor: Joseph Koa
