BAUKAU, STLTIMORLESTE.com – Iha loron 26 Agostu 2025 pur volta tuku 11:00 insendiu ka ahi han uma kultura Lor Santu Antonio iha area Kairavela, Postu Administrativu Vemasi, Munisipiu Baukau too mutuk.
Komandante Operasional Autoridade Protesaun Sivil Munisipiu Baukau, Francisco Viana Freitas haktuir hafoin insendiu nee akontese parte Autoridade Protesaun Sivil Munisipiu Baukau simu kontaktu husi Autoridade Postu Vemasi hodi too kedas fatin, maibe la konsege salva, tanba kestaun distansia nunee too tarde, maibe konsege atua insendiu nee hodi la alastra ba uma vizinhu sira.
“Tuir ami nia ekipa haree no observa uma nee hanesan uma kultura ida ao mesmu sasan mos hela iha laran. Ita konta uma lisan, tanba sasan kultura nia iha laran la hetan salvasaun,” hateten Francisco ba jornalista STL iha knaar fatin Tirilolo, Baukau, Tersa (26/08/2025).
Komadante nee konta, sasan neebe iha uma laran rezulta hetan estragus mak hanesan haree kulit, tais feto no mane, bikan kanuru, osan no sasan kultura nian.
Nia sublina, kauza husi insendiu nee parte Autoridade Protesaun Sivil seidauk hatene motivu lo-loos, maibe sei oriente ekipa halo indentifikasaun klean, tanba insendiu nee akontese nain halao hela servisu kultural iha fatin seluk.
“Insendiu nee ahi mai husi neebe neebe nain mos la hatene, maibe la iha ema ida kanek dadaun sei iha indentifikasaun no halo asismentu fo apoiu emerjensia,” Franscisco akresenta.
Entretantu uma kultural refere antes nee idozu Silvestre Correia idade 68 no oan Geraldo Sebastião Correia mak hela.
(tom)
