BAUKAU, STLTIMORLESTE.com – Ahi han uma lisan Katilari iha Aldeia Ossomesa, Suku Bualale, Postu Administrativu Kelikai, Munisipiu Baukau too mutuk.
Xefe Suku Bualale, Gabriela da Conceição konta, motivu ba insendiu refere parte Autoridade Suku seidauk hatene, maibe tuir informasaun ahi laran husi liur hafoin alastra ba uma lisan refere neebe deskonfia kauza husi sigaru rohan.
“Ahi nee husi liur mai han uma adat ida nee mutuk hotu, sasan lulik sira, hahan sira mos tau hotu ba laran la salva,” Gabriela informa liu husi telefone, Kuarta (08/10/2025).
Nia sublina, husi insendiu nee komunidade sira tenta salva sasan kultural maibe la konsege salva, tanba ahi alastra makaas, maibe la rezulta ema ruma kanek no seluk tan.
Relasiona insendiu nee Autoridade Suku halo kedas kontaktu ba parte Korpu Bombeiru Munisipiu Baukau too fatin, maibe la konsege salva, tanba kestaun distansia husi Postu Baukau Vila too Aldeai Ossomesa, Suku Bualale, Postu Kelikai dook.”Bombeiru too duni maibe ahi mate tiha ona mak foin sira too, tanba lao dook nee,” Gabriela akresenta.
Lideransa Komunitaria nee deklara, Suku Bualale ofisialmente implementa ona tara bandu iha fulan kotuk ho regras neebe rigorozu, tanba nee sei halo identifikasaun ba asaun refere hodi sidadaun neebe involve iha asaun refere sei prosesu tuir regras tara bandu Suku Bualale nian, maibe parte Suku labele promete, tanba too ohin loron seidauk hatene autor ba asaun refere.
Entretantu insendiu refere akontese iha loron 06 Outumbru 2025 pur-volta tuku 15:00 parte loraik.
Jornalista: Tomas Reis
Editora: Carme Ximenes
