DILI, STLTIMORLESTE.com – Ministru Obras Publikas (MOP) Samuel Marcal hatete, Eletrisidade mate beibeik iha territoriu laran laos sala husi lideransa Eletrisidade Timor Leste, Empreza Publika (EDTL.EP), maibe sistema neebe EDTL.EP uza mak ladun diak.
“Hau troka tiha lideransa EDTL,EP ahi la mate ona ga, tanba saida mak liga fali lideransa ho ahi, neebe ahi mate laos tanba problema ho lideransa, maibe ohin hau esplika ba deputadu sira katak ita tenke muda ita nia sistema balu liu-liu ita hakoi fiu hahu husi Bidau Sengol ba too iha Bekora, tanba iha nasaun Singapora no Australia ema nia ahi la mate tanba ema nia fiu nee hakoi iha rai,” hatete Ministru Obras Publikas (MOP), Samuel Marcãl ba jornalista sira hafoin remata Audiensia ho Komisaun E iha PN, Sesta (24/01/2025).
Nia hatutan, ahi iha Timor durante nee mate beibeik tanba fiu eletrisidade nian tara deit iha ai-leten sira nee, kuandu udan anin makaas aitohar sei fo impaktu ba iha distribuisaun linha eletrisidade ba populasaun sira.
“Udan ka anin makaas ai-tohar mak ahi sei mate, nee laos ita atu rezolve problema maibe atu rezolve problema nee ita presiza identifika didiak problema fundamental nee iha neebe,” nia esplika.
Problema seluk neebe EDTL,EP hasoru mak orasn, nee iha deit substasaun ida deit iha Kamea no Feeder iha lima (5), nia konslet Feeder ida haksoit ahi laos deit mate iha Dili deit, maibe tama too Munisipiu Ermera neeba.
Governante akresenta liu tan katak, Governu liu husi EDTL,EP ba oin presiza hadia sistema hanesan foin lalais nee loke substasaun iha Komoro nunee ita bele iha back up, nunee ahi mate karik iha deit fatin ida, labele too iha Munisipiu Aileu no Ermera mate hotu kedas.
“Kuandu ita tau tan substasaun ida tan ita sei monta sistema ida, nunee ba oin ahi mate karik iha fatin ida deit, labele too Munisipiu Aileu no Ermera sira nee mate hotu kedas,” esplika nia
(alb)
