DILI, STLTIMORLESTE.com – Daudaun nee Eletrisidade kontinua mate lakan, sai preokupasaun ba populasaun, tanba nee Ministru Obras Publika (MOP) laiha kapasidade bele foti liman, troka ema seluk.
Xefe Bankada CNRT, Duarte Nunes hatete, kona-ba kestaun ahi mate lakan nee sai preokupasaun boot, la.hatene tanba saida mak akontese hanesan nee, ahi mate lakan, depois buka sira atu fo solusaun sira laiha, dala ruma kontaktu sira maibe telemovel mate hela.
“Ho kestaun sira nee, halo ita stres, tanba ahi kontinua mate lakan, maibe tuir hau haree jestaun mak ladiak, tanba material sira iha. Povu nafatin hakilar no media sira kontinua hakerek, tanba nee presiza haree oinsa atu bolu Ministru Obras Publika (MOP) hodi husu took problema nee saida, tanba ita iha Makina, ita tau osan halo manutensaun, maibe ahi mate beibeik née problema saida”, dehan Duarte ba jornalista sira iha PN, Segunda (02/12/2024).
Nia dehan, sira sei buka dalan oinsa atu bolu MOP halo esklaresimentu.
“Karik MOP sente laiha ona kapasidade bele foti liman hodi bele tau fali ema seluk iha MOP, tanba agora ita hotu hakarak iha naroman, maibe ahi mate lakan nee oinsa”, tenik Duarte.
Tuir nia, aban karik iha reunian iha PN, nia sei hatoo ba Prezidente PN, oinsa buka meius atu bolu MOP mai klarifika ba kestaun ahi mate lakan. Agora atu besik ona Natal Tinan foun povu presiza naroman.
Laos nee deit, maibe ahi mate lakan nee bele fo impaktu mos ba investor sira atu mai investe, tanba investor sira atu loke fabrika ruma, maibe ahi mate lakan, oinsa atu produs. Tanba nee sira sei bolu atensaun ba MOP atu toma atensaun ba preokupasaun nee.
Entretatu too notisia nee hatun, STL seidauk halo konfirmasaun ho MOP, Samuel Marçal.
(gui)
