DILI, STLTIMORLESTE.com – Autoridade Inspesaun Fiskalizasaun Atividade Ekonomiku Sanitaria no Alimentar (AIFAESA) halo inspesaun no divulga informasaun kona-ba segaru ilegal ba negosiante sira iha Merkadu Taibesi.
Diretora Operasional AIFAESA, Claudinha Soares Pinto dehan, hamutuk ho Autoridade Munisipiu Dili, Jestaun Merkadu, Seguransa Alimentar nomos parte Agrikultura mai divulga informasaun ba operador ekonomiku sira.
“AIFAESA hamutuk ho Autoridade Munisipiu Dili, Jestaun Merkadu, Seguransa Alimentar nomos parte agrikultura ita mai halo divulgasaun informasaun ba ita nia operador ekonomiku sira, ba negosiante ambulante neebe mak faan sigaru iha Merkadu Taibesi,” hatete Claudinha Soares Pinto ba jornalista sira iha Merkadu Taibesi, Kuarta (3/09/2025).
Nia dehan, objetivu husi inspesaun no divulgasaun informasaun nee, atu fahe informasaun ba operador ekonomiku sira oinsa faan produtu sigaru neebe mak governu bandu, tuir dekreitu lei Nu.14/2016, ida nee hatur regra baziku para operador ekonomiku sira, atu nunee sira faan tabaku tuir regra neebe iha.
Tanba nee liu husi divulgasaun informasaun nee oinsa esplika ba sira saida mak tabaku ilisitiu ilegal nee rasik mak hanesan sigaru surya no LA esse, nunee mos fahe informasaun kona ba tabaku neebe mak governu bandu, labele faan ninia kompozisaun husi tabaku nee rasik, tanba iha lei nee mos negosiante sira lafaan tabaku rahun, atu nunee labarik minoridade sira husi tinan 17 tun kraik labele sosa tabaku nee.
Nia sublina, embalajen ho lingua ofisiais hanesan sigaru neebe mai husi nasaun sira seluk nee sigaru ilegal, nunee mos tabaku neebe sirkula iha rai laran livremente sem selu tasa ba iha governu, tanba sigaru neebe ilegal lakontribui tasa ba iha estadu nee rasik, tanba nee operador ekonomiku presiza informasaun para apoiu governu kombate sigaru ilegal neebe sirkula iha rai laran.
Nia infroma, ba tabaku sira neebe sirkula iha rai laran livremente lakontribui selu tasa ba iha governu, tanba nee presiza tebes fahe informasaun ba operador ekonomiku sira, para sira bele hatene atu labele kombate sigaru ilegal iha TL.
Nunee ba operador ekonomiku neebe fahe informasaun ba sira, maibe kontinua faan tabaku ilegal sei hetan sansaun wainhira AIFAESA halo inspesaun hetan selu koima US$ 70 too US$ 1000.
Jornalista: Joaninha Belo
Editora: Domingas Gomes
