BAUKAU, STLTIMORLESTE.com – Autoridade Inspesaun no Fiskalizasaun ba Atividade Ekonomia, Sanitaria no Alimentar, Instituisaun Publiku (AIFAESA,IP) halo inspesaun ba loja, kios no restorante sira iha Munisipiu Baukau.
Inspetor Tekniku Eufrásio Guterres Silveira esplika, inspesaun neebe realiza iha Munisipiu Baukau kobre deit Postu Administrativu 3 mak hanesan Postu Administrativu Baukau Vila, Kelikai Antigu no Postu Administrativu Vemasi, tanba bazeia ba despaisu husi inspetora jeral AIFAESA hodi halo inspesaun ba kios, loja inklui restorante iha Postu 3 refere.
“Ami ba Postu Kelikai Antigu maioria kios, iha Vemasi mos ami ba iha Vemasi foho maioriamente kios sira mak iha neeba iha Baukau Vila horseik no ohin kobre husi loja, restorante, padaria no kios,” hateten nia ba jornalista sira hafoin halo inspesaun ba loja sira iha Postu Administrativu Baukau Vila, Sesta (21/11/2025).
Nia sublina, durante inspesaun iha Postu Kelikai Antigu, Vemasi no Baukau Vila kobre ona loja, restorante, padaria no kios hamutuk 86 neebe parte ekipa AIFAESA konsege priende sasan sira liu prazu hanesan produtu kimiku hanesan naan manu kalen, sardina, susu been, produtu kosmetiku, paun, popmie inklui sigaru surya hamutuk slop 20.
Nia fundamenta, inspesaun refere bazeia ba dekretu lei numeru 23/2009 no halo aprensaun ba produtu hirak nee, tanba liu prasu no hanesan sigaru Surya la permiti atu faan iha Timor-Leste.
“Kuantidade ba produtu estragadu hamutuk 11 i sigaru ilisitu nee slop 20 i nia masu hamutuk 72, sasan sira nee ita sei kontinua prosesu ba ami nia inspetora jeral foti medida tuir lei vigora,” Eufrásio akresenta.
Entretantu inspesaun refere hetan akompanhamentu husi parte seguransa husi Komando Polisia Munisipiu Baukau.
Jornalista: Tomas Reis
Editora: Domingas Gomes
