DILI, STLTIMORLESTE.com – Sosiedade Sivil Forum Naun Governamental Timor Leste (FONGTIL) husu Autoridade Inspesaun Fiskalizasaun Atividade Ekonomika Sanitaria e Alimentar (AIFAESA) labele hein deit keixa husi konsumidores mak tun halo inspesaun ba sasan, maibe tenke regular halo inspesaun ba loja sira, para labele fo risku ba konsumidores.
Tuir Diretur FONGTIL, Valentim da Costa Pinto katak, relasiona ho loja SEARA faan naan manu liu prazu, tanba nee iha instituisaun neebe asegura sasan neebe tama iha merkadu, tanba direitu konsumidor nee tenke hetan sasan neebe kualidade ho kondisaun diak atu konsumu labele afeita ba ninia saude.
“Relasiona ho sitausaun nee ami husu tebes ba iha AIFAESA no Instituto Qualidade Timor-Leste (IQTL), halo intervensaun no fiskalizasaun monitorizasaun ba fatin loja faan nain sira neebe faan sasan tenke regular labele hein keixa, maibe tenke regular ho vizita hodi halo inspesaun ba sasan sira neebe faan para bele asegura direitu konsumidores sira,” dehan Diretur Ezekutivu FONGTIL, Valentim da Costa Pinto ba STL iha Kaikoli, Kinta nee (24/10/2024).
Tanba nee labele hein deit keixa husi konsumidores, maibe sira iha knaar atu halo kontrolu ba iha movimentu merkadu nian tanba hatene katak tempu barak ona, koalia tenke fasilita instrumentu AIFAESA nian, liu-liu ba laboratorium para rekruta ema sira neebe iha kualifikasaun diak, no iha konesementu para sasan sira neebe importante mai Timor husi kontainer sira labele direita ba merkadu, maibe iha kontrulu ruma ba sasan sira nee hodi bele permite sasan sira husi fontes neebe los no kualidade duni ka lae lori ba iha merkadu antes ema hola.
(joa)
