BAUKAU, STLTIMORLESTE.com – Relasiona anin intensivu neebe makaas iha loron 19 Janeiru 2026 parte dader hatohar ai lamtoru hun ida monu hodi hanehan sidadaun feto ida naran Natasia Joselina Belo Fraga, idade 23, iha Aldeia Lutumutu, Suku Tirilolo, Postu Administrativu Baukau Vila, Munisipiu Baukau.
Informasaun nee hatoo husi Xefe Suku Tirilolo Elvino Freitas ba jornalista sira iha fatin akontesementu Lutumutu, Segunda (19/01/2025).
“Tuir informasaun nee hau rona husi familia katak, hau nia sidadaun Natasia idade 23 ohin dadersan nia fase ropa iha torneira maibe hodi kalan kedas udan anin makaas entaun rai dodok ona ai nee tohar tarutu mos nia la hatene monu lansung iha nia leten habiit nia ulun, entaun vizinhu mai salva hiit sae ai nee lori nia ba Hospital maibe la konsege salva,” dehan Elvino.
Xefe Suku nee informa, asidente nee iha loron 19 Janeiru 2026 parte dader pur-volta tuku 10:00 bainhira vitima refere fase hela ropa iha bee torneira neebe besik hela iha nia uma, maibe kauza husi anin boot silu ai lamtoru hun refere hodi hanehan.
Nia sublina, hafoin aihun refere hanehan tiha vitima mak vizinu sira hetan nunee halai ba hiit aihun refere hodi lori sai vitima ba Hospital Rejional Eduardo Ximenes (HoREX) Baukau, maibe la konsege salva.
“Vitima nee la konsege salva tanba tuir mediku nia ulun fatuk mak rahun tanba nee too iha Hospital nia hakotu iis ohin lori fali ona mai iha ninia hela fatin,” Elvino akresenta.
Vitima nia aman, Carlito de Asis Fraga konta, vitima sai husi uma atu fase ropa iha bee torneira neebe besik uma, maibe ho intensivu anin boot rezulta ai lamtoru hun hanehan vitima iha fase ropa fatin.
“Nia lori ropa ba fase hau tur hela uma kotuk, mak labarik sira hakilar hau halai ba vitima toba tiha ona iha ai okos, entuan hau trauma tanis deit ona mak nia aman sira sorin nee mai foti sae ai nee foti sai nia,” Carlito informa.
Tuir vitima nia aman katak, vitima mate kedas iha fatin akontesementu, tanba aihun refere hanehan iha parte ulun rezulta ran nakfakar iha fatin akontese.
Entretantu vitima mate husi hela oan mane ida no laen kaben Nelson Soares neebe daudaun servisu iha nasaun Portugal.
(tom)
