DILI, STLTIMORLESTE.com – Daudaun nee aimoruk abate sufisiente iha Servisu Saude Munisípiu Dili atu atende ba sidadaun sira iha Munisipiu Dili.
“Kona-ba aimoruk abate ita sufisiente atu atende ba ita nia komunidade sira,” hatete Diretor Servisu Saude Munisipiu Dili, Mateus Pinto ba STL iha nia knaar fatin Formoza Díli, Kuarta (12/2/2025).
Nia dehan, aimoruk abate nee pesoal saude sira sempre tama sai uma hodi fahe ba kada uma kain idak-idak.
“Ita nia pesoal saude sira sempre tama sai komunidade sira nia hela fatin hodi fahe aimoruk abate, atu sira soe ba bee tanki laran hodi prevene susuk tolun iha laran no hamate bakteri iha bee laran,” nia Informa.
Iha fatin ketak, Komunidade Suku Komoro, Afonso Aleixo da Silva esplika, fulan tolu-tolu profisional saude sira sempre vizita sira hodi fahe aimoruk abate, atu sira soe ba tanki bee nian hodi prevene susuk tolun no bakteri.
“Foin daudaun ita nia pesoal saude sira nain rua mak mai iha nee atu fahe aimoruk abate, maibe ami ba hotu servisu, entaun labarik sira mesak iha uma, sira rasik lori aimoruk abate nee ba soe iha bee tanki laran,” nia afirma.
(jen)
