DILI, STLTIMORLESTE.com – Daudaun nee stok vasina virus rabies iha Hospital Nasionál Guido Valadares (HNGV) mamuk, maibe parte Instituisaun Nasionál Farmasia Produtu no Medikamentu (INFPM) kolabora ona ho The United Nations Development Programme (UNDP) nomos The World Health Organization (WHO) hodi bele sosa vasina nee.
Nia dehan, stok vasina rabies iha HNGV mamuk nomos iha fatin tolu Bobonaro, Ermera no Oekusi.
“Stok iha nee limitadu tebes, maibe tuir informasau katak, INFPM hetan ona kontaktu husi UNDP ho WHO atu sosa vaksina ba virus rabies nee,” hatete Diretor Servisu Apoiu Diagnostiku no Terapeutiku iha Hospital Nasional Guido Valadares (HNGV), Vidal de Jesus Lopes ba jornalista sira iha nia knaar fatin HNGV, Kuarta (09/07/2025).
Nia esplika, daudaun nee stok iha INFPM limitadu, nunee labele fahe ba sentru saude sira, tanba atu atende deit ba kazu emerjénsia sira.
“Tuir informasaun ita rona katak, agora daudaun iha INFPM 300 vial vasina nee atu asegura ba situasaun emerjensia deit, nee seidauk bele distribui ba fasilidade saude sira seluk, sira hein UNDP ho WHO nia tama ona nee sira bele distribui,” nia deklara.
Entretantu dadus neebe STL rekolha iha terenu, daudaun nee Timor Leste rejistu Timoroan nain hitu (7) mak mate tanba virus rabies, no vitima sira nee mai husi Munisipiu Bobonaro, RAEOA no Ermera.
(jen)
