DILI, STLTIMORLESTE.com – Daudaun nee aimoruk fomigasau sufisiente iha Servisu Saude Munisípiu Dili, hodi rega ba bairu neebe hetan moras dengue.
“Ita nia aimoruk fomigasaun iha Servisu Saude Munisípiu Dili sei sufisiente hodi responde ba dengue,” hatete Diretor Servisu Saude Munisipiu Dili, Mateus Pinto ba STL iha nia knaar fatin Formoza Díli, Kinta (13/02/2025).
Nia dehan, aimoruk fomigasaun sufisiente hodi responde ba aldeia no suku neebe risku ba dengue.
“Ita sempre pereparadu ba aimoruk fomigasaun, tanba wainhira aldeia ida iha ona ema moras dengue, ita haruka pesoal saude sira ba rega aimoruk fomigasaun ba iha komunidade nia uma laran, maibe laos uma hotu-hotu, uma ida neebe hetan ona moras dengue, tanba rega uma ida ou rua, uma sira seluk nee mos aimoruk nee tama hotu ona no susuk bele mate,” nia informa.
Iha fatin ketak, Komunidade Suku Komoro, Afonso Aleixo da Silva esplika, Komunidade Suku Komoro, Aldeia 4 Setembru nee pesoal saude sira mai rega ona aimoruk fomigasaun ba uma haat.
“Sira mai rega aimoruk fomigasaun tanba ami uma laran nain rua mak moras dengue, nomos hau nia vizinhu nia oan ida, tanba nee sira mai rega aimoruk fomigasaun,” nia afirma.
(jen)
