DIILI, STLTIMORLESTE.com – Diretór Servisu Apoiu Diagnóstiku no Terapéutiku Hospital Nasional Guido Valadares (HNGV), Vidal de Jesus Lopes rekonhese aimoruk multivitamina laiha ona iha HNGV no fo ona orientasaun ba empreza instana farmasia atu kompra emerjensia hodi hatama ba HNGV iha semana nee.
“Ami rekonhese duni aimoruk multivitamina laiha nee los, no semana nee empreza Instana Farmasia atu hatama mai iha HNGV,” hatete Diretór Servisu Apoiu Diagnóstiku no Terapéutiku HNGV, Vidal de Jesus Lopes ba jornalista sira iha nia knaar fatin HNGV, Kuarta (14/05/2025).
Vidal esplika, aimoruk multivitamina laiha nee hanesan Konselhu Diretivu HNGV kontaktu ona empreza farmasia atu fornese mai HNGV.
“Ami kompra direita husi HNGV, durante nee fornesedor nee husi IMFPM, maibe stoke out HNGV bele utiliza nia orsamentu hodi halo kompras liu husi empreza neebe HNGV halo kontratu mak hanesan Instana Farmasia no Betesda, ida kompras ba konsumaveis no ida seluk kompras ba aimoruk liu-liu ba nesesidade emerjensia nian,” nia esplika.
Antes nee pasiente Carlito Sousa preokupa aimoruk multivitamina iha HNGV, daudaun nee stok mamuk durante fulan rua.
“Hau mai konsulta ba hau nia moras ba mediku sira pasa reseita mai hau, hau tenke konsumu multivitamina, hau nia mak multivitamina deit, hau ba farmasia sira hatan dehan aimoruk laiha, entaun hau komesa koalia lian makaas oituan halo diskute malu ho sira, no sira haruka hau ba koalia ho Xefe Departamentu no nia esplika katak, sim multivitamina kuaze fulan ida ka rua hanesan nee mak aimoruk laiha no kontaktu ona INFPM atu rezolve asuntu nee,” nia deklara.
Nia informa, relasiona ho aimoruk multivitamina iha HNGV laiha, pasiente mos preokupa ho aimoruk sira seluk, tanba bainhira pasiente sira presiza urjente aimoruk balun sei laiha.
(jen)
