DILI, STLTIMORLESTE.com – Servisu Edukasaun Munisipiu Ainaro (SEM) submete ona dadus estudantes finalista husi Ensinu Baziku, Sekundariu no Tekvo ba Ministeriu Edukasaun (ME).
Diretor Servisu Edukasaun Munisipiu Ainaro, Patricio da Costa Magno dehan, finalista nivel Ensinu Sekundariu 1088, Tekvo 109 no Ensinu Baziku 1,527. Dadus estudantes finalista nee submete hotu ona ba ME iha Agostu liu ba.
“Ita nian finalista nivel ensinu sekundariu 1088, tekvo 109, ensinu baziku 1,527, dadus ita nian estudantes finalista nee ita submete hotu ona ba ME iha Agostu liu ba, inklui valor estudantes finalista nian iha ezame primeiru no segundu periodu ninia,” dehan ba jornalista STL liu husi telefone, Tersa (09/09/2025).
Nia hatutan, dadus estudantes finalista sira nian nee haruka tiha ona ba iha ME, agora hein deit estudantes sira atu partisipa ezame nasiona. Neebe tuir kalendariu Ministériu nian,sei halao iha fulan Outobru tinan ida nee.
Iha fatin seluk Kordenador Gabineti Unidade Kurikulum Nasional iha ME, Joao Maupelu dehan, preparasaun ba ezame nasional ninia, agora iha hela faze elaborasaun pontus ezame nasional ba ensinu baziku no ano ho sekundariu jeral desimu segundu, tekvo dsimu segundu.
Nia hatutan, sei kontinua elabora mak halo revizaun final, depois sei kontinua ba iha empresaun pontus ezame nasional.
Fazeadamente elaborasaun pontus ezame hotu ona, agora halo revizaun cuality kontrol ba pontus nee besik finaliza ona. Neebe lao tuir kalendariu neebe iha, inisiu de Setembru hahu ba imprimi ona pontus ezame nasional, la sala iha loron 8 fulan Setembru nian laran.
Iha fatin seluk Diretor Eskola Sekundariu Nobel da Paz, Jeremias P.de Jesus hatete, konaba sira nian lista finalista haruka tiha ona ba ME liu husi Servisu Edukasaun Munisipiu Dili nian, tanba ezame nasional nee rasik sei halao iha fulan Outubru nia laran.
Jornalista: Jacinta Sequeira
Editora: Domingas Gomes
