DILI, STLTIMORLESTE.com – Organizasaun Asia Justice And Rights (AJAR) preokupa ho Aeroportu Internasional Nicolau Lobato, Komoro, tanba hahu governasaun anterior too agora seidauk rezolve.
Kestaun nee hatoo husi Peskizador AJAR, Inocencio de Jesus Xavier ba jornalista sira iha nia knaar fatin Farol, Tersa (25/03/2025).
Nia hatete, preokupa ho problema Aeroportu Internasional neebe too ohin loron seidauk rezolve, ida nee Governu liu-liu Ministeriu Transporte Telekomunikasaun mak iha interese atu halo luan pilar ida husi aeroportu nee.
“Problema Aeroportu Internasional Nicolau Lobato nee dezde governasaun uluk too ohin loron seidauk rezolve, la hatene mekanizmu aprosimasaun ba rezolusaun konflitu ba rezolve problema disputa,” dehan nia.
Nia katak, too iha neebe Governu sira nia modalidade aprosimasaun hodi bele fo satisfasaun ba sidadaun sira neebe hela iha Aeroportu nee no tanba sa mak sidadaun sira kontinua mantein iha neeba, entaun Governu tenke iha solusaun, tanba Governu mak iha kompetensia atu fo solusaun saida mak diak ba sidadaun sira.
Nia dehan, presiza dezenvolvimentu, maibe labele tanba razaun dezenvolvimentu nee fo buat ruma hanesan taka deit ema nia ibun hodi hatete buat loos nee injustisa. Tanba, prinsipiu justisa nee ema ruma hakarak hetan desizaun ruma insatisfas, se desizaun ida mai ho presaun, koersiva nee la reprezenta valor justisa ida loos.
Nunee mos Feto Potensial Maria Amaral hatete, Aeroportu Internasional nee hanesan odamatan husi Timor Leste nia, tanba nee Governu presiza hadia ho diak, nunee ema estranjeiru bainhira tun husi aviaun sente duni katak Aeroportu Timor Leste furak.
“Laos ita nia ema tun husi Aeroportu haree mak popmie taka bobot iha Aeroportu, ida nee ba ami sente ladun furak. Laos lakohi promove hahan sira nee lae, bele faan no promove liu husi iklan maibe fatin laos iha Aeroportu,” katak nia.
Nia hatutan, Governu mos iha planu atu halo luan Aeroportu Internasional Nicolao Lobato, ida nee politika diak maibe koalia deit tenke tau iha pratika.
(eme)
