DILI, STLTIMORLESTE.com – Ajensia Internasional hamutuk ho Governu realiza workshop ho objetivu atu halo intervensaun transformativu pratika sustentabilidade no servisu sira, hodi haforsa kualidade prevensaun ba violensia bazeia ba jeneru (VBJ) iha Timor Leste (TL).
“Ohin ami destaka rezultadu sira neebe mosu husi esforsu kolaborativu husi Governu Timor Leste, organizasaun sosiedade sivil sira, no ami nia ajensia haat ONU nian, UN Women, IOM, UNDP no UNFPA, iha tinan haat liu ba,” hatete Koordenadór Residensia interinu ONU iha Timor-Leste (TL), Arvind Mathur liu husi nia diskursu iha City8 Manleuana, Dili, Segunda (28/10/2024).
Tanba tuir nia progresu substansial hetan ona iha abordajen ba Violensia Bazeia ba Jeneru (VBJ), esforsu kolaborativu ida nee fo impaktu pozitivu ba feto, mane, labarik feto, labarik mane no grupu marjinalizadu sira nia moris liu husi lori mudansa iha atitude sosiedade nian no inspira perspetiva transformativa konaba violensia iha Timor Leste.
Nunee violensia bazeia ba jeneru diminuisaun besik 37% iha feto sira no diminuisaun 23% iha mane sira neebe justifika violensia, bazeia ba levantamentu final programa nian iha munisípiu haat hanesan Dili, Baukau, Kovalima no Oekusi, neebe partisipa iha programa The Together for Equality (T4E) reflete aseitasaun neebe redus ba violensia bazeia ba jeneru iha individual no nivel interpesoal sira.
Maibe integrasaun violensia bazeia ba jeneru no direitu saude seksuál no reprodutiva iha kurríkulu nasional ba estudante ensinu sekundariu garante katak foin-sae sira hetan edukasaun konaba asuntu vital sira nee hahu kedas iha idade kiik.
Iha fatin hanesan, Sekertaria Estadu Igualdade (SEI), Elvina Sousa Carvalho agardese ba Governu Korea liu husi ajensia kooperasaun internasional KOICA, neebe mak apoiu finanseiru ba programa ida nee ba tinan haat husi Novembru 2020 too Novembru 2024.
“Ita boot sira nia kontribuisaun no dedikasaun ba atinji igualidade jeneru iha Timor Leste liu husi servisu hamutuk ho Governu Timor Leste hodi prevene no resposta ba violensia bazeia ba jeneru, ho ita nia esforsu hamutuk atu kombate violensia hasoru feto no labarik feto iha Timor Leste. Ita hotu hatene katak atu luta kombate violensia feto no labarik feto laos deit atu atinji igualidade jeneru, maibe atu harii futuru jerasaun neebe livre husi kualker forma husi violensia ka violensia bazeia ba jeneru,” nia esplika.
Nia haktuir, ema hotu hotu tau esforsu hamutuk atu komabate violensia hasoru feto no labarik feto iha Timor Leste, luta ba kombate violensia hasoru feto no labarik feto laos atu atinji igualidade jeneru, maibe atu harii jerasaun foun neebe livre husi forma violensia hasoru feto no labarik feto.
Nunee mos, Espesialista ba Programa Hamutuk ba Igualdade ka The Together for Equality (T4E), Nuntana Tangwinit dehan, programa survei neebe mak implementa iha tinan haat nia laran hatudu ona iha mudansa boot.
Nia dehan, Violensia bazeia ba jeneru nuudar asuntu krítiku ida ho nia impaktu ba ema barak iha Timor Leste, neebe afeita ba saude, seguransa no dignidade sobrevivente sira-nian. Programa T4E hatan ba dezafiu hirak nee liu husi aprosimasaun multisetorial neebe envolve parte-interesada oin-oin iha sosiedade laran tomak.
(jen)
