DILI, STLTIMORLESTE.com – Relasiona ho Komemorasaun Loron Liberdade Imprensa ba dala 32, nunee Asosiasaun Jornalista Timor Leste (AJTL) husu Governu atu respeita knaar jornalista sira nian, wainhira halao kobertura iha terenu.
“Husu ba Governu no aparellu estadu sira seluk hanesan Polisia atu respeita jornalista ka media sira bainhira halao knaar iha terenu no fo espasu ba sira hodi halo kobertura asuntu sira neebe liga ho servisu publiku nian,” dehan Prezidente AJTL, Zevonia Vieira iha Salaun HAK, Farol, Dili, Sabadu (3/05/2025).
Nunee mos, jornalista no redasaun kanal media hotu atu obedese nafatin Kodigu Etika Jornalizmu nian bainhira halo kobertura, hodi halo publikasaun notisia no programa sira neebe iha ligasaun ho servisu publiku nian.
Husu ba Conselho Imprensa (CI) atu pro ativu hodi halo advokasia no ativamente responde ba situasaun hotu neebe liga ba independensia jornalizmu no liberdade imprensa, liu-liu aktu impedimentu ba jornalista iha kampu no intervensaun politika iha sala redasaun media sira nian.
AJTL mos husu ba Governu atu para ona halo politizasaun ba estrutura Media Estatal sira hanesan RTTL no Ajensia Notisioza Tatoli, tanba media laos instituisaun politika nunee kada tinan lima tenke politiza, se lae index liberdade imprensa sei monu.
“Husu ba Governante sira, liu-liu SECOMS atu para ona halo intervensaun politika ba iha sala redasaun media estatal sira, no para ona halo impedimentu ba jornalista sira iha terenu no husik sira livre no independentemente halao sira nia knaar tuir Konstituisaun RDTL no Lei Komunikasaun Sosial,” dehan Zevonia Vieira.
Nia sublinha, loloos aparellu estadu sira mak sai defensor no protetor ba liberdade imprensa no liberdade espresaun iha pais nee, tanba Konstituisaun RDTL Artigu 40 no 41 garante ida-nee, maibe sira mak sai fali ameasa ba liberdade imprensa no liberdade espresaun iha Timor-Leste, ho faktu konaba Timor-Leste ninia index liberdade imprensa monu ba da-ruak tanba kauza justifikadu sira.
(EST/2)
