DILI, STLTIMORLESTE.com – Relasiona ho kondisaun Eskola Baziku Filial (EBF) N°. 5 Larimi, iha Munisipiu Lautém, Postu Administrativu Iliómar, Suku Caenlio, iha Bairo Dirnu, neebe durante nee kuantidade estudante oituan, tanba nee akademiku no komunidade sira konkorda atu halo konstrusaun eskola foun ba iha fatin sentru.
“Ita haree EBF N°. 5 Larimi iha Postu Administrativu Iliómar, durante nee numeru estudante la barak, tanba eskola distansia dook kuaze 2 km, no estudante presiza hakur mota mak ba eskola, kuandu kondisaun mota boot, entaun impede estudante sira atu ba eskola, durante nee mos mota hamate ona estudante balun, nunee akademiku no komunidade sira konkorda atu halo konstrusaun ba eskola foun besik ba komunidade, atu sira bele tuir prosesu estudu ho adekuadu,” dehan Akademiku Universidade Institutu Politekniku Betano (IPB), Herminio da Costa ba STL, iha Kolmera, Dili, Kinta (19/12/2024).
Nia hatete, husi Akademiku Universidade IPB, Herminio da Costa katak, komunidade sira iha Postu Administrativu Iliómar, Suku Caenlio, husu ba Governu liu husi Ministeriu Edukasaun (ME) atu halo konstrusaun eskola foun, hodi hakbesik ba komunidade sira, liu-liu tau ba iha fatin sentru sira, nunee vida estudante sira bele kontinua no halao atividade eskola ka kursu formal ho diak.
Tanba durante nee EBF N°. 5 Larimi eziste ona iha Postu Administrativu Iliómar, maibe dook husi aldeia sira, entaun kuantidade estudante sira ba eskola menus, eskola distansia dook, bainhira tempu udan, mota tuun bele fo risku ba estudante sira, tenke hakur liu mota mak foin ba eskola, nunee husu ba Governu liu-liu kompanhia privadu balun neebe atu halo reabilitasaun, diak liu halo konstrusaun eskola foun ba besik komunidade hodi asesu eskola ho seguru.
Iha sorin seluk, Xefi Aldeia Larimi, Manuel da Silva dehan, eskola Baziku Filial N°. 5 Larimi durante nee kondisaun ladun diak ona, nunee Governu mai ho planu ida atu halo reabilitasaun, maibe hanesan autoridade lokal no aldeia husu diak liu halo konstrusaun foun eskola ba fatin neebe sai sentru ba estudante sira, tanba eskola refere daudaun nee dook husi estudante sira, kuaze estudante sira lao deit ho distansia 2 km, husi estudante idak-idak nia rezidensia.
Eskola refere durante nee eziste tinan 1999 iha Larimi, momentu nee kuantidade estudante barak, tanba eskola refere iha fatin sentru ba estudante sira, maibe agora muda fali eskola ba iha Baro Dirnu, entaun numeru estudante menus, nunee husu ba Governu liu husi ME atu buka meius ida, hamutuk ho autoridade lokal sira, diak liu halo konstrusaun eskola foun no tau ba iha fatin sentru hodi akumula estudante sira ba aprende ho diak.
(EST 1)
