DILI, STLTIMORLESTE.com – Akademiku husi Institutu Of Busnise (IOB) konkorda ho intervensaun Prezidente Republika, Jose Ramos Horta, katak Eletrisidade De Timor Leste, Empreza Publika (EDTL,EP) presiza re-inbolsa fali komunidade sira nia sasan neebe hetan estragus husi kauza eletrisidade mate lakan.
Dosente IOB, Antonio Soares Martins ba jornalista iha knaar fatin, kuarta nee (07/01/2026) hatete, servisu EDTL nian ema hotu-hotu akompanha, laos iha kapital deit, pior liu iha foho sira semana tomak eletrisidade mate.
Dosente dehan, ministeriu neebe responsavel masimu ba EDTL nee presiza haree, diak liu tenke halo re-inbolsa ba ema nia sasan elektronika sira neebe nia kauza husi ahi eletrisidade neebe mate lakan.
Nia dehan, iha instituisaun boot sira neebe sempre akontese ahi mate lakan, munisÃpiu sira sempre ahi mate, liu-liu iha Ermera nee ahi bainhira mate nee semana rua tomak ahi mate, la moris, agora nia kauza nee iha neebe.
“Ita enxe pulsa, ahi mate nee signifika ninia jestaun parte lideransa mak la diak, entaun presiza haree ida nee. Hau konkorda ho Prezidente Republika kona-ba re-inbolsa sasan sira neebe tantu instuituisaun ka ema invidual sira neebe hetan estragus nia kauza husi ahi mate lakan ita presiza haree ida nee,” dehan Dosente IOB, Antonio.
Nia haktuir tan katak, parte responsavel ba iha EDTL presiza tau matan ba ida nee, tanba governu gasta osan barak ba iha instituisaun sira neebe hanaran EP no IP sira mais balun la fo retornu ba estadu, so gasta deit. Hnesan EDTL nee barak liu estadu mak subsidia sira, maibe sira husi Prezidente too staf sira moris ho vensimentu salariu neebe boot, mais nafatin haree akontese ahi nee mate lakan.
Tanba nee diak liu presiza haree ida nee, se ema ninia lideransa mak la diak, troka ema ho matenek, nunee haree halo jestaun diak, satan Timor Leste tama ona ASEAN mak agora ahi nee mate moris nee atu sai saida.
“Hau hanoin konkorda ho Prezidente Republika ninia hanoin no intervensaun ba ida nee, depois EDTL bele re-inbolsa fali ema nia sasan sira neebe hetan estragus husi kauza eletrisidade mate lakan,” konklui nia.
Nunee mos Vise Diretor Dahuluk Asosiasaun Hak, Antonino de Limas hatete, preokupasaun Prezidente Republika nian nee mos durante nee sai mos preokupasaun publiku, no mos sosiedade kona-ba eletrisidade mate kalan, hanoin tinan barak nia laran, konsumidor barak sofre sira nia ekipamentu sasan uma laran elektroniku sira aat, tanba eletrisidade mate, balun mos dala ruma nia arus nee la estabil, entaun nee afeta ba sasan ekipamentu sira nia balun aat.
“Hau hanoin Prezidente Republika lo-loos laos atu husu EDTL selu, maibe Xefe Estadu hatete ba governu, deputadu sira atu prepara lei ba protesaun konsumidor sira nian. Lei kona-ba protesaun ba konsumidor sira, nunee bainhira iha problema hanesan nee, iha lei nunee konsumidor sira bele halo keixa, durante nee problema iha lei nee,” nia dehan.
Jornalista: Emerenciana Pinto
