DILI, STLTIMORLESTE.com – Prezidente Republika (PR), Jose Ramos Horta hatete, komunidade akademika mak fundamental hatan ba nesesidade nasaun.
Nia dehan, ohin halibur iha auditoriu ida-nee, iha oportunidade ida atu debate papel ensinu superior nian hodi hakbiit foinsae sira.
“Momentu reflesaun ida, tanba tinan ida nee ita selebra aniversariu konsulta popular ba dala 25 neebe determina Timor Leste nia Indepedensia. Ita nia universidade no ninia komunidade akademika mak fundamental atu hatan ba nesesidade nasaun nian no kontribui ho ativu ba ita nia nasaun nia kreximentu,” hatete Xefe Estadu ba jornalista sira, bainhira remata selebrasaun tinan 24 ejistensia UNTL, iha Kampus UNTL Hera, Sesta (15/11/2024).
Xefe Estadu hatutan, dezde restaurasaun Indepedensia iha tinan 22 liu ba, Timor Leste hetan ona progresu neebe notavel. Iha tinan 1999, iha deit universidade ida. Ohin loron, iha instituisaun ensinu superior 18 neebe serve estudante rihun 40 resin. Iha 1975, Timor iha deit doutoradu ida, ohin loron iha atus ba atus. UNTL ho nia graduadu sira halao papel esensial iha trajetoria dezenvolvimentu ida nee, kontribui ba formasaun profisional sira no avansu sientífiku no tekniku Timor Leste nian.
Konkista sira nee sai posivel deit tanba profesor no graduadu sira nia dedikasaun husi UNTL no husi universidade sira seluk no husi instituisaun edukativa privada sira, neebe, iha tinan barak nia laran, komplementa Estadu nia kompromisu ba edukasaun. Kompromisu ida-nee hahu husi ensinu pre-primeiru, liu husi ensinu baziku gratuitu no universal, too eskola sekundaria jeral no tekniku-vokasional, no mos ensinu superior no politekniku.
Avansu sira reflete mos iha infraestrutura no servisu publiku esensial sira. Agora daudaun iha mediku liu rihun ida, kreximentu impresionante ida dezde 2002, bainhira iha deit nain 19 atu atende populasaun tomak.
Tanba kobertura eletrika neebe iha tinan 2002 limitadu no intermitente deit iha kapital, ohin loron habelar ba liu porsentu sianulu-resin-neen (96%) husi teritoriu nasional, fornese eletrisidade konfiavel ba maioria Timoroan sira rede infraestrutura transporte nian mos evolui makaas, ho ponte, estrada no auto-estrada sira neebe liga munisípiu hotu-hotu.
“Ita mos investe iha mobilidade ema nian no sasán sira nian, ho dezenvolvimentu Portu Baía Tíbar no konstrusaun aeroportu rejional, neebe hakbesik Timor Leste ba mundu no promove kreximentu ekonomiku. Iha avansu sira-nee hotu, knaar UNTL nian sai Fundamental, hodi komplementa investimentu sira Estadu nian iha etapa ida idak edukasaun nian. Hamutuk profesor sira, estudante sira no graduadu sira, ita lao ona dalan naruk iha formasaun rekursu umanu sira neebe kualifikadu tebes,” katak Horta.
Horta afirma, husi Timor- Leste nia susesu labele hasai husi responsabilidade atu konserva, mantein no hadia didiak patrimoniu boot ida-nee. tenke foka nafatin ba kompromisu sira neebe halo ona iha Objetivu sira Dezenvolvimentu Sustentavel nian (ODS), neebe ezije nafatin atensaun no asaun atu bele alkansa hotu.
(eme)
