DILI, STLTIMORLESTE.com – Akademiku sira iha rai laran aseita ho programa julgamentu movel neebe halao husi Tribunal ba iha munisipiu, tanba lori justisa hakbesik ba komunidade sira.
Tuir Akademiku Universidade Nasional Timor Lorosae (UNTL), Sebastião dos Santos katak, programa ida nee diak tanba autor Judisiariu sira ba halao julgamentu iha munisipiu, ida nee pasu ida diak tebes tanba lori justisa hakbesik ba komunidade sira.
“Halo julgamentu iha munisipiu sira ida nee diak liu, tanba lori justisa hakbesik ona ba komunidade sira, ohin loron populasaun balu hela ho distansia neebe dook sira susar atu mai iha kapital, maibe ho programa ida nee diak liu,” dehan Sebastiano ba jornalista STL iha Kaikoli, Dili, Kinta (14/08/2025).
Nia hatutan, presiza halo mudansa ba iha setor justisa, atu nunee komunidade sira neebe hela iha area remotas, sira mos sente katak justisa nee iha duni.
Tanba ohin loron komunidade balu hela iha dook banhira hasoru problema ruma mai tuir julgamentu iha Dili, sira tenke presiza osan selu transporte, ida nee mos bele sai dezafiu ida ba sira, tanba nee sujere atu programa neebe iha kontinua lao ba oin, atu bele lori justisa hakbesik ba iha publiku sira.
Antes nee Juiz Administrador Tribunal Oekusi, Evanjelinho Belo deklara, julgamentu movel la funsiona iha Tribunal Oekusi, maibe julgamentu sira iha sentru kontinua lao normal.
“Julgamentu movel la lao kedan iha tinan 2019, tanba nee espera Konselhu bele buka solusaun atu tempu badak bele reativa hikas julgamentu movel,” dehan nia.
Nia dehan, maske julgamentu movel lao iha Tribunal Oekusi, maibe julgamentu sira iha sentru kontinua lao, atu haree ba keixa sira neebe tama. Iha Tribunal Oekusi oras nee daudaun prosesu neebe rejista makaas mak kontra bandu no violensia domestika inklui abuzu seksual.
Aleinde nee Juiza Administradora Tribunal Dili, Edite Palmira dehan, Tribunal movel kontinua lao, maibe antes atu halao julgamentu refere tenke hatoo uluk pedidu ka programa ba iha Prezidente Tribunal Rekursu, neebe hanesan mos Prezidente Konselhu Superior Majistradu.
“Programa julgamentu movel kontinua lao nafatin, atu halo julgamentu movel iha nia regra fulan ida antes tenke haruka ona programa no pedidu sira nee ba iha Prezidente Tribunal Rekursu hanesan mos Prezidente Konselhu, nia aprova tiha mak Juiz sira bele foin ba,” dehan Juiza Edite.
Nia hatutan, iha julgamentu movel nee iha area krimi nian Juiz sira ba nain tolu Juiz koletivu, no lori prosesu 30, hodi halao julgamentu durante semana ida iha loron Segunda too Sesta.
(ter)
