DILI, STLTIMORLESTE.com – Iha semana hirak foin lalais nee estrada iha munisipiu sira sai hanesan palku ba parede kareta luxu Estadu nian. Primeiru Ministru (PM), Kay Rala Xanana Gusmão lao ka viajen ba baze hanesan knaar ida neebe ema hotu louva tanba lider tenki rona povu, maibe realidade neebe akompanha vizita nee konvoiu neebe naruk no delegasaun neebe boot tebes, hamosu kestaun etika neebe akademista no sidadaun sira kestiona.
Timor Leste (TL) sei hasoru dezafiu ekonomiku neebe boot, bainhira sidadaun sira haree dezenha karreta Governu nian neebe sosa ho osan povu nian, gasta ba kombustivel neebe ho folin karun, povu labele nonok hodi husu adekuadu ka lae gasta sira nee ho dezafiu neebe povu moris ba.
Ho dezafiu sira nee halo Akademista UNPAZ, José Xavier fo hanoin katak, lideransa laos deit ho prezensa fizika, maibe mos ho ezemplu moris simples. Bainhira Governu koalia kona-ba jere osan ho diak, maibe iha terrenu ema haree fali hahalok hatudu kbiit, neebe kria distansia mental entre politika no povu neebe sei moris iha mukit nia laran.
“Iha tempu neebe ita prepara ba fo responsabilidade ka autarkia ba Munisipal, imajen neebe ita presiza hatudu mak imajen servisu neebe efisiente. Se bele lori deit karreta 8, tanba sa tenki lori 20 resin ho delegasaun neebe barak halo sidade kiik sira iha foho nakdoko hotu,” hatete Akademista nee ba STL, Segunda (23/03/2026).
Tanba tuir nia, politika nee laos deit kona-ba lori dezenvolvimentu, maibe mos kona-ba oinsa uza rekursu neebe limitadu ho laran moos. Povu presiza dezenvolvimentu neebe tun ba sira nia moris, laos deit rai rahun husi karreta sira neebe liu lalais hodi ba fali Dili.
Iha parte ketak Observador Politika, Antonio da Costa hatete, Primeiru Ministru, Kay Rala Xanana Gusmao mak figura neebe baibain la tauk soke ho povu, tur iha rai no rona kbiit laek sira, Maibe konvoiu neebe naruk hanesan ular tasi nee kria kapa ida neebe hamosu distansia. Neebe tuir nia hanesan paradoksu ka la iha lojika.
“Ita nia lider ida neebe povu hadomi, maibe protokolu ida neebe uza nee todan liu. Delegasaun neebe boot liurai nee hatudu imajen elit nian, laos imajen servidor neebe mai atu rona povu,” dehan Antonio.
(car)
