DILI, STLTIMORLESTE.com – Relasiona ho situasaun neebe akontese iha Munisipiu Bobonaro konfrontu entre grupu arte marsiais, Provedor Direitus Humanus no Justisa (PDHJ) lamenta ho situasaun nee.
“Maibe akontese ona, lamenta ho situasaun nee husu ba Komando Jeral Polisia Nasional Timor Leste (PNTL) atu halo investigasaun, hodi hola medida investigasaun, ami rasik husi parte PDHJ nian mos orientasaun ba ona iha delegasaun teritorial ami nian, hanoin sei halo investigasaun,” dehan Provedor Direitus Humanus no Justisa, Virgilio da Silva Guterres ba jornalista sira iha Muzeum Rezistensia, Kuarta (21/05/2025).
Nia hatutan, rona notisia no informasaun hanesan nee laran triste, liu-liu implika joven ida kanek informasaun ikus dehan mate.
Akresenta tan, primeiru lamenta ho situasaun ida nee, hein katak Komando PNTL hola medida hodi halo investigasaun neebe klean hodi hatene lo-loos situasaun nee. No PDHJ nian iha delegasaun teritorial Maliana, horiseik sira fo informasaun jeral kona-ba insidente nee, sira informa katak too ospital Mediku sira halo intervensaun maibe la konsege salva joven nee nia vida.
Reforsa tan, ema dehan kazu nee mosu tanba intervensaun Polisia nian, maibe ita hein prosesu investigasaun, tanba husi investigasaun mak ita hatene lo-loos nia kauza nee. Maibe kualker maneira kauza atu tiru ka sona sente triste, tanba joven ida mate. La iha nesessidade ema ida mate iha selebrasaun eventu Nasional hanesan 20 Maiu.
Nunee, buat ida neebe buka atu hanoin mak kapasidade Estadu nian atu garante seguransa ba ita nia komunidade, kapasidade ita nia Estadu nian no autoridade seguransa sira nian atu identifika potensial konflitu, se hatene identifka potensial konflitu, iha kapasidade halo intervensaun atu prevene.
Esplika, se ita hatene iha Kailako nee grupu arte marsiais oin-oin, ida nee iha potensial konflitu, ita nia medida atu halo prevensaun mos iha.
Iha fatin ketak, Akademiku UNTL, Rafael de Jesus dehan, husu atu halo investigasaun hodi hatene lo-loos kazu nee, joven ida neebe mate kauza mai husi saida.
“Tenke halo investigasaun atu hatene loloos mate tanba saida, ohin loron publiku barak sei preokupa kona-ba ida nee,” dehan nia.
Hatutan tan, publiku sei preokupa kona-ba joven nee nia mate, tanba nee tenke fo justifikasaun neebe klaru atu labele hamosu preokupasaun iha sosiedade nia leet.
(ter)
