DILI, STLTIMORLESTE.com – Akontesimentu neebe akontese iha Kailaku rezulta joven ida lakon vida, Provedor Direitu Humanus no Justisa (PDHJ) lamenta ho aktu nee, tanba falha iha seguransa.
“Ami lamenta ho situasaun ida nee, kondena kualker aktu violensia, liu-liu aktu neebe rezulta sidadaun joven ida mate,” dehan Provedor Direitus Humanus no Justisa, Virgilio da Silva Guterres ba STL iha Kaikoli, Kuarta (28/05/2025).
Nia hatutan, husu ba iha Komando PNTL halo investigasaun hodi hatene kazu nee, no Provedor nia haree akontesimentu nee mosu tanba Estadu falha atu fo seguransa ba sidadaun sira, liu-liu iha eventu Nasional sira neebe ema komemora maibe akontese situasaun triste hanesan nee.
Informa tan, husi parte Provedor nian delegasaun teritorial iha Maliana halo hela investigasaun, no hein deit atu simu relatoriu investigasaun.
Iha fatin ketak, Akademiku UNTL, Sebastião dos Santos dehan, fatin sira neebe risku ba problema, autoridade seguransa sira tenke mantein iha neeba.
“Hau hanoin fatin neebe deteta iha ona risku ba problema, kuandu eventu sira nunee autoridade seguransa sira tenke mantein iha fatin neeba, kaundu la iha ikus mai akontese problema too sai nunee,” dehan nia.
Hatutan tan, ohin loron akontese ona problema too joven ida lakon vida, tanba nee husu atu ba oin fatin sira neebe deteta iha konflitu tenke tau seguransa iha neeba, atu labele akontese tan hanesan saida mak akontese ona nee.
Hanesan Akademiku sente triste ho situasaun nee tanba joven ida lakon ona vida, husu atu ba oin labele akontese tan situasaun hanesan nee.
(ter)
