BAUKAU, STLTIMORLESTE.com – Bainhira projetu reabilitasaun estrada urbana Baukau Vila implementa, sei halo alargamentu husi diresaun Nagardjo too Vila Nova ho luan metru 20 too 22.
Prezidente Autoridade Munisipiu Baukau, Veneranda Lemos hateten, kona-ba alargamentu estrada urbana Baukau Vila Autoridade Munisipiu enkontru ona ho Xefe Suku Bahu no Tirilolo neebe sei involve iha ekipa levatamentu dadus afetadu ba alargamentu estrada refere, tanba sei afeta ba komunidade sira nia uma hela fatin no kios balun neebe hela besik liu estrada publiku.
“Iha parte Nagardjo nian tun mai iha too Vila Nova alargamentu pur volta 20 too 22 metrus. Ami husi Autoridade sei simu fila fali ekipa husi Nasional mai halo aprezentasaun kona-ba estrada nia luan no modelu para ita iha Munisipiu haree hotu para alargamentu nee aumenta tan rotunda ga valeta ou trotoar,” hateten Veneranda Lemos ba STL iha Vila Nova Baukau, Kinta (29/05/2025).
Nia sublina, tuir planu parte Ajensia Dezenvolvimentu Nasional (ADN), Ministeriu Obras Publikas (MOP) no kompanhia implementador projetu refere sei aprezenta ba entidade sira iha Baukau kona-ba medida estrada no dezenhu molok implementa servisu iha terenu.
Tuir informasaun neebe iha reabilitasaun estrada husi area Nagardjo too area Vila Nova sei halo alargamentu ba estrada ho luan husi metru 20 too 22.
Enkuantu husi Vila Nova ba Vila Antiga tuir informasaun sei halo alargamentu estrada luan ho metru 10, maibe klaru liu hein dezenhu husi tenkinu nasional neebe sei aprezenta iha tempu besik no bainhira implementa sei fo impaktu ba komunidade balun nia hela fatin neebe besik estrada publiku neebe hetan ona markasaun sinal X iha tinan kotuk.
“Projetu nee sei implementa iha tinan nee, foufoun iha diskusaun nia laran hateten iha Maiu nee nia laran atu halo ona lansamentu primeira pedra, tanba ADN haruka halo fali verifikasaun, entaun ami mos halo komunikasaun ho ADN para haree took, se prontu ona ita haree nia dezenhu,” Veneranda katak.
Iha sorin seluk, Diretor Servisu Munisipal Obras Publikas Baukau, Agostinho Ximenes esplika, prosesu reabilitasaun estrada urbana Baukau Vila dadaun ekipa sei halo hela verifikasaun ba dezenhu no planu sei implementa estrada diresaun rua husi area Nagardjo too Vila Nova Igreja Vizaun Kristaun Tirilolo.
“Husi Nagardjo tun mai bundaran, tun tan mai loja simples ho vizaun kristaun nia oin pur-volta 5 kilometru nee mak hasai dua jalur, area seluk nee tipu seluk dezenhu sei verifika hela iha ADN ho kontraktor Jova,” katak Agostinho.
Diretor nee sublina, tuir dezenhu husi Nagardjo too Vila Nova dirasaun rua, enkuantu seluk hanesan husi edifisiu sentru saude Tirilolo too Vila Antiga besik Salaun Sentru Konvensoens mantein diresaun ida, maibe sei halo alargamentu, tanba area balun medida estrada kloot.
Entretantu estrada urbana Baukau Vila neebe hein atu reabilita hamutuk kilometru 23 neebe tuir planu sei implementa iha tinan nee.
(tom)
