BAUKAU, STLTIMORLESTE.com – Iha loron 01 Julhu 2025, pur volta tuku 12:00 meudia, insendiu afeta ba alfaiate Ficilia iha Vila Nova Baukau too mutuk, tanba kauza husi sirkuitu eletrisidade.
Nain ba alfaiate Ficilia konta, iha loron 01 Junhu parte dader bainhira oan feto ba dapur no hetan sirkuitu fiu eletrisidade dala tolu, maibe oan feto la halo asaun tanba tauk, maibe la kleur tarutu rezulta ai lakan alastra iha uma laran.
Nunee parte vitima sira tenta kontaktu ba parte Eletrisidade Timor Leste Baukau hodi hamate enerjia eletrisidade no kontaktu ba parte ekipa bombeiru Munisipiu Baukau too fatin hodi halo kombate insendiu refere, maibe sasan sira hanesan makina, hena suku no seluk tan la konsege salva, tanba mutuk.
“Makina roupa iha 30, ida nia folin US$ 300.00 ho hena barak, ohin ami halo rinkas roupa universitas UCT, ami rencana semana ida nee nia laran atu estor, maibe ohin ahi han hotu tiha ona,” hateten nain ba Alfaiate, Ficilia ba jornalista sira iha fatin akontesimentu Vila Nova Baukau, Tersa nee (01/07/2025).
Nia sublina, husi insendiu aleinde estraga roupa ba estudante universitariu husi UCT, roupa ba estudante eskola português kompostu husi pre-eskolar too ensinu sekundaria no seluk tan neebe rezulta too mutuk.
Mezmu nunee, vitima nee agradese ba Maromak, tanba durante insendiu la rezulta ema ruma kanek no seluk tan.
“Akontesimentu ida nee dala ruma fo atensaun ida mai ami, hau agradese labarik sira saude diak nafatin,” nain Alfaeati Ficilia nee espresa.
Komandante Korpu Bombeiru Munisipiu Baukau, Cristalina Fraga Coreia akresenta, kauza husi insendiu refere parte bombeiru seidauk hatene klaru, maibe parte ekipa bombeiru konsege halo intervensaun mezmu sasan sira la konsege salva, tanba simu kontaktu tarde.
“Ami mai ahi han makaas loos tiha ona, informasaun ba ami mak tarde, tanba liu husi via telefone entaun ami mai tarde oituan, maibe konsege hamate,” Cristalina argumenta.
Komandante nee deklara, kombate insendiu iha Alfaiate Ficilia nee hetan apoiu husi Bombeiru Autoridade Munisipiu Baukau, tanba parte Korpu Bombeiru iha deit viatura ida, maibe Korpu Bombeiru Baukau nia atuasaun iha insendiu refere la rezulta vitima sira hetan kanek no seluk tan.
(tom)
