BAUKAU, STLTIMORLESTE.com – Organizasaun Naun Governamental Asistensia Legal ba Feto no Labarik (ALFeLa) estabelese ona kaixa de keixa ba eskola balu iha Munisipiu Baukau, atu estudante sira halo keixa bainhira hasoru violenisia ruma husi profesores sira iha eskola.
Koordenador Prevensaun no Advokasia, Antonino Marques esplika, razaun ALFeLa estabelese kaixa de keixa iha eskola atu fasilita estudante sira, tanba dala ruma profesores sira halo servisu barak iha eskola bele hamosu violensia hasoru estudante sira iha prosesu aprendizajen, nunee bainhira estudante ida hetan violensia ruma husi profesores ida bele hatoo informasaun liu husi kaixa de keixa refere hafoin ALFeLa prosesa.
“Por ezemplu estudante ida hetan violensia abuzu seksual ka violensia fiziku neebe pratika husi profesor, entaun estudante bele hatoo informasaun por escrito, depois encaixa iha kaixa de keixa nee ita foti prosesu,” Koordenador Prevensaun no Advokasia, Antonino Marques hateten ba jornalista sira hafoin abertura atividade workshop iha salaun apuramentu Vila Nova Baukau, Kinta (05/03/2025).
Nia informa, kaixa de keixa neebe ALFeLa estabelese ona iha inisiu tinan nee hamutuk 4, neebe estabelese ona iha eskola EBC Soba Laga, EBC Ossokeli, Eskola Tekniku Vokasional Baukau no Eskola Ensinu Sekundaria Postu Baguia.
Maibe atu reforsa estabelese kaixa de keixa nia funsionamentu, mak ALFeLa lansa workshop ho tema “Labarik Sira Livre Husi Violensia” hodi involve Autoridade Munisipal, Suku no Diretor Servisu Edukasaun Munisipal inklui profesores no estudante sira atu hasae konhesimentu kontribui iha prosesu sira.
Iha fatin hanesan, partisipante estudante Ana AparÃcio husi Eskola Tekniku Vokasional Baukau katak, ALFeLa lansa ona kaixa de keixa iha eskola refere ho objetivu atu fasilita estudante sira hatoo keixa hasoru bainhira hetan asaun violensia ruma husi profesores ida.
“Ba hau kaixa de keixa nee diak, tanba ami feto hasoru violesia ruma karik ami bele hatoo keixa iha ALFeLa no Polisia,” Estudante Ana AparÃcio espresa.
Enkuantu Diretor Servisu Munisipal Edukasaun Baukau, Afonso dos Santos da Costa rekonhese, estabelesimentu kaixa de keixa husi ALFeLa iha eskola 4 refere, tanba kooperasaun ho Ministeriu Edukasaun no konsidera estabelesimentu kaixa de keixa refere importante tebes atu ajuda vitima sira, maibe antes ALFeLa halo asaun tenke iha koordenasaun ho parte Edukasaun.
“Kuandu labarik ruma keixa ita tenke aprosima informasaun klaru, depois mak ita prosesa, labele kiik boot kiik boot prosesa ita nia profesores sira bele dezanima ikus mai bele hamenus kinerza servisu,” Afonso argumentu.
(tom)
