DILI, STLTIMORLESTE.com – Durante fulan Janeiru too Marsu, Organizasaun Feto Asisténsia Legal ba Feto no Labarik (ALFeLa) fasilita ona prosesu ba vitíma hamutuk 112 asesu ba justisa iha tribunal.
Hatete Diretora Ezekutivu ALFeLa, Marcelina Amaral ba jornalista sira iha nia knar fatin Vila Verde, Sesta (28/03/2025).
Nia dehan, kada loron ALFeLa fo asistensia legal ba feto no labarik sira iha teritoriu laran hodi asesu ba iha sistema justisa formal.
Nia esplika, kazu neebe mak durante nee sira fasilita ba asesu justisa nee kompostu husi kazu violénsia domestika, violasaun seksuál no abuzu seksual ba minoridade.
“Hahu husi fulan Janeiru too Marsu nee ita fasilita ona asistensia legal ba vitíma feto no labarik hamutuk 112 iha teritóriu laran asesu ba justisa,” nia informa.
Nia hatutan, husi vitíma sira nee feto hamutuk 111 no labarik na’in ida (1) hodi hetan justisa.
“Husi kazu hirak nee iha 20 mak hetan ona desizaun finál husi tribunal, seluk ALFeLa sei kuntinua akompanha iha tribunál,” nia esplika.
Nia afirma, husi kazu hirak nee aas liu mak Dili kuaza 56, Oekusi iha 24.
Iha fatin ketak, Sekretariu Estadu Igualidade, Elvina Sousa Carvalho haktuir, atu reduz numeru kazu hirak nee governu kria ona Komisaun Inter-Ministerial no inkliu mos ALFeLa no FOKUPERS hodi kria fahe servisu ba malu hodi prevene.
“Ita halo servisu ida neebe mak integradu, ho nia area kobertura luan ba iha prevensaun oinsa bele intensifika, kampanha sosializasaun sira hodi bele muda mentalidade ba hahalok violénsia sira nunee mos resposta husi linha-ministerial sira ba vitíma sira,” nia koalia.
Nia deklara, kada Ministeriu sei halo nia servisu hodi apoiu vitíma sira, ezemplu Ministériu Saúde halo tratamentu Saude, Ministeriu Solidariedade Sosiál fo apoiu ba vitíma sira.
ALFela halo nia servisu fo asistensia legal no FOKUPERS haree ba uma mahon ba vitíma sira,” nia argumenta.
Nia afirma, ba oin sei halo servisu neebe integradu hodi bele halo prevensaun ba violensia hasoru feto no labarik hodi bele respeita prinsipiu igualdade jeneru.
(jen)
