BAUKAU, STLTIMORLESTE.com – Dirijente Organizasaun Naun Governamental Asistensia Legal ba Feto no Labarik (ALFeLa) Baukau hamutuk ho Autoridade Munisipal lansa fatuk dahuluk ba konstrusaun edifisiu ALFeLa rejional iha Aldeia Lutumutu, Suku Tirilolo, Postu Administrativu Baukau Vila, Munisipiu Baukau.
Diretora Ezekutiva ALFeLa Marcelina Amaral hateten, durante ezistensia ALFeLa nian tinan 20 iha Baukau laiha edifisiu rasik, maibe servisu ba atendimentu vitima sira kontinua lao, tanba utiliza edifisiu Pradet Baukau. Maibe liu husi apoiu orsamentu husi embaixador Nova Zelandia iha Timor-Leste ho montante rihun US$ 28 ba ALFeLa, mak iha loron 30 fulan Janeiru 2026 parte ALFeLa rejional Baukau hamutuk ho Autoridade Munisipiu Baukau, inklui entidades importante sira lansa fatuk dahuluk ba konstrusaun edifisiu ALFeLa nian iha Baukau ho medida 9×10 ho durasaun servisu fulan 6.
“Iha Baukau sentru ba Munisipiu Lautem, Manatuto nomos Vikeke, tanba haree ba ita nia inan feto kiik oan sira neebe sai vitima prezisa sira nia fatin espasu seguru,” hateten Marcelina Amaral liu husi nia diskursu iha fatin seremonia lansamentu fatuk dahuluk, Sesta (30/01/2026).
Nia konsidera, konstrusaun edifisiu refere, bainhira remata sei fasilita diak liu tan parte ALFeLa hodi fo asistensia legal vitima sira, tanba bele iha ona espasu seguru ba vitima sira.
Nia komenta, mezmu konstrusaun refere ALFeLa sei iha edifisiu foun, maibe sei la taka odamatan ba rede referal sira, tanba ALFeLa iha ona espasu nunee sei fo fatin refee ba rede referal sira atu utiliza mos ba diskusaun ba kazu komplikadu sira no seluk tan.
“ALFeLa fo agradesementu embaixador Nova Zelandia neebe mak fo apoiu fundus kiik ba iha ALFeLa hodi harii edifisiu ALFeLa Baukau, nia objetivu mak ba fo benefisiu ba ita Baukau oan sira liu liu feto ho labarik feto neebe sai vitima,” Marcelina Amaral espresa.
Iha fatin hanesan, Sekretaria Munisipal Asuntu Sosiais no Organizasoens Maria Celestina Viegas hateten, konstrusaun edifisiu rejional ba ALFeLa iha Munisipiu Baukau importante tebes atu estabelese, tanba Baukau nuudar Munisipiu sentru ba Munisipiu vizinhu sira atu atende asistensia legal ba feto no labarik.
“ALFeLa importante oinsa mak bele fo asistensia legal ba feto ho labarik sira neebe hetan violensia domestika iha nivel rejional, rede referal neebe eziste iha Baukau hamutuk nafatin atu oinsa mak bele apoia masimu ba ita nia parseira sira ho objetivu ida deit ajuda ita nia feto maluk sira ho oan feto sira hetan violensia,” Maria katak.
Sekretaria Munisipal nee husu organisazaun naun governamental sira neebe eziste iha Munisipiu Baukau atu nafatin servisu hamutuk hodi fo asistensia legal ba feto no labarik sira neebe infrenta violensia domestika no violensia seluk tan.
Entretantu seremonia lansamentu nee hetan partisipasaun husi reprezentante Prezidente Autoridade Munisipiu Baukau, Autoridade Suku Tirilolo, Unidade Polisia Vuneraveis (VPU-sigla inglês), Sentru Solidariedade Sosial Munisipiu Baukau no entidades Sosiedade Sivil sira seluk neebe eziste iha Munisipiu Baukau.
(tom)
