DILI, STLTIMORLESTE.com – Visi Ministru Asuntu Parlamentares, Aderito Hugo hatete, IX Governu Konstitusional liu husi koligasaun Partidu Kongresu Nasional Rekonstrusaun Timorense (CNRT) ho Partidu Demokratiku (PD) solidu no metin tebes, tanba nee sei ukun too tinan 2028.
Kestaun nee Adeito Hugo koalia hodi hatan deklarasaun Sekretariu Jeral Partidu FRETILIN, Mari Alkatiri neebe hatete katak, mandatu IX Governu Konstitusional sei la dura too tinan 2028.
“Ohin hau respota ona kontinua mehi nafatin ba, IX Governu hakarak halo servisu, lakohi resposta ba mehi sira neebe bele inventa no mehi ho karakter diverte sira nian ba hodi hein, tanba mandatu Governu nian sei too tinan 2028,” hatete Aderito Hugo ba jornalista sira iha resintu PN, Segunda (17/02/2025).
Nia hatutan, mandatu IX Governu Konstitusional sei la rahun, tanba IX Governu liu husi koligasaun CNRT-PD oras nee solidu tebes hodi implementa kompromisu eleitoral too tinan 2028.
“Koligasaun CNRT-PD solidu tebes hodi ezekuta kompromisu eleitoral partidu rua nee nia ba povu, se ita la fo resposta ba kompromisu eleitoral ba povu entre CNRT ho PD halo iha eleisaun parlamentar liu ba nee ita la iha responsabilidade politika no moral ba povu,” dehan nia.
Antes nee Sekretariu Jeral Partidu FRETILIN, Mari Alkatiri deklara, Mandatu IX Governu Konstitusional sei la dura, tanba tuir informasaun neebe nia asesu Primeiru Ministru sei rezigna aan iha tempu besik.
“Hau la fiar atu remata, tanba governu ida nee sei iha remodelasaun laos IX Governu ona, maibe X Governu, tanba hau rona Primeiru Ministru atu rezigna aan, signifika IX Governu nia vida badak, mai X Governu tenke iha Governu no orsamentu foun, tanba nee lalika hein IX Governu nee too tinan 2028,” hatete SekJer FRETILIN, Mari Alkatiri.
(alb)
