DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, tinan ida nee indise Liberdade Imprensa husi 20 tun ba 39, tanba intervensaun makaas husi Governu ba media sira.
Sekretariu Jeral Partidu FRETILIN, Mari Alkatiri hatoo lia hirak nee ba jornalista sira iha nia knaar fatin Farol, Kuarta nee (07/05/2025).
Sekretariu Jeral Partidu FRETILIN, Mari dehan, se nafatin iha intervensaun ba media sira nia serbisu, indise nee sei tun liu tan.
“Nee mak hau hatete ohin husi 10 tun ba 20 no husi 20 tun ba 39 nee sei nunee nafatin kontinua tun tan,” dehan Mari Alkatiri.
Indise Liberdade Imprensa husi 20 tun ba 39, tuir sekretariu Jeral nia haree ida nee impaktu husi saida? hatan ba kestaun nee Sekretariu Jeral Partidu FRETILIN, Mari Alkatiri dehan, impaktu mak Governu hodi osan kontrola media ou ameasa.
“Impaktu nee husi Governu hodi osan kontrola, ameasa, uluk laiha ema ida koalia ida nee, hau deside hahu koalia ida nee laos hau koalia deit mak ema hatun mais realidade, ita nia Governasaun ida nee prosesu Governu Governasaun laos Governu deit tomak nee, Governasaun atu fo imajen ba iha liur halo buat seluk iha laran, ba liur nee sira mak kampiaun demokratiku ba laran nee impoin desizaun ditadura nee mak akontese iha ita nia rai,” dehan Sekretariu Jeral Partidu FRETILIN, Mari Alkatiri.
Karik numeru indise nee atu mantein saida mak presiza halo? Hatan ba kestaun nee Sekretariu Jeral dehan, primeiru tenke iha konsiensia hodi rekonhese idak-idak nia sala.
“Ita hotu-hotu iha sala tanba ema sala nain duni, idak-idak tenke rekonhese, tanba nee mak iha 2018 molok halo kontajen de votus hau dehan hau husu deit mak eleisaun ida nee povu mak bele manan mais la komprende, nee hau dehan partidu neebe deit mak manan servi diak nia povu nee mak hau halo proposta atu balansu reuniuan ho lider 1974 no 1975 too 1990 atu tuur hamutuk nain 6 ka 7 para halo balansu iha dezempenhu koletivu individual para ita tuur hamutuk hateke hamutuk ba oin,” katak nia.
Nia dehan, laos eleisaun laiha, rai nee sei harii hela maibe presiza hametin saida mak atu harii los, kurizi saida mak lalos para rai nee ba oin.
(eme)
