DILI, STLTIMORLESTE.com – Relasiona ho deklarasaun husi Sekretariu Jeral Partidu FRETILIN Mari Alkatiri, neebe deklara katak IX Governu Konstitusional la dura, hatan ba kestaun nee Prezidente Republika (PR) Jose Ramos Horta hatete, diak liu ba haree beioan no partidu, duke preokupa ho Governu.
Prezidente Republika Jose Ramos Horta hatoo kestaun nee ba jornalista sira iha Palasiu Prezidensial Nicolau Lobato, Bairru Pite, Dili, Tersa (18/02/2025).
“Sekretariu Jeral Partidu FRETILIN, Marí Bim Amude Alkatiri nusa la haree nia beioan sira, haree didiak partidu uma laran nee mos kuitadu, katuas tanan-tanan deit ona, joven laiha agora ba litik fali Avo Nana,” katak PR Horta.
Prezidente Republika hatete, tuir nia haree IX Governu neebe lidera husi Primeiru Ministru (PM) Kay Rala Xanana Gusmão servisu diak, no Sekjer FRETILIN tuur deit tanba nee la haree.
“Lae, Avo Nana halo servisu diak, governu halo servisu diak, Avo Mari Alkatiri tur deit, la haree servisu Governu halo iha foho nee. Servisu barak lao daudaun, Governu foin mak tinan ida deit, hakarak Primeiru Ministru atu rezigna aan, VIII Governu podia rezigna aan tiha ona. Hau mak aguenta sira, lae, labele eleisaun antesipada, labele, kria instabilidade, buka apoia VIII Governu atu bele halo servisu too remata,” dehan PR Horta.
Prezidente hatutan, nia buka tane Governu, tanba nee mak nia labele ezije fali Governu.
“Hau buka tane Governu, hau frustrasi kritika nee, mas hau labele ezije fali, hau mak hatene liu, hau koalia demais Avo Nana hatete, Apa Ramos ita hakarak sai Primeiru Ministru prepara ita ba eleisaun manan Primeiru Ministru, entaun ita bele halo buat hotu-hotu. Agora Prezidente diak liu labele interfere demais fali, buat hotu-hotu ita hakarak haree barajen, halo fali persegisaun ba Sekretáriu Estadu Asuntu Toponímia no Organizasaun Urbana (SEATOU) Germano, maun Xanana hanoin hau persegisaun ba nia. Hau nein hatene nia, hau haree mak nia sapeo tuan nakles boot nee,” katak nia.
Nunee mos Visi Ministru Asuntu Parlamentares, Aderito Hugo hateten, IX Governu Konstitusional liu husi koligasaun partidu Kongresu Nasional Rekonstrusaun Timorense (CNRT) ho Partidu Demokratiku (PD) solidu tebes, tanba nee sei ukun too tinan 2028.
“Ohin hau respota ona kontinua mehi nafatin ba, IX Governu hakarak halo servisu, lakohi resposta ba mehi sira neebe bele inventa no mehi ho karakter diverte sira nian ba hodi hein, tanba mandatu Governu nian sei too tinan 2028,” hatete Aderito.
Antes nee Sekretariu Jeral Partidu FRETILIN, Mari Alkatiri deklara Mandatu IX Governu sei la dura, tanba tuir informasaun neebe nia asesu Primeiru Ministru sei rezigna aan iha tempu besik.
“Hau la fiar atu remata, tanba Governu ida nee sei iha remodelasaun laos IX Governu ona maibe X Governu, tanba hau rona Primeiru Ministru atu rezigna aan, signifika IX Governu nia vida badak, mai X Governu tenke iha Governu no orsamentu foun, tanba nee lalika hein IX Governu nee too tinan 2028,” hatete Mari Alkatiri.
(eme)
