DILI, STLTIMORLESTE.com – Eis Primeiru Ministru atual Sekretariu Jeral Partidu FRETILIN, Mari Alkatiri hatete, nia lakohi partisipa diskusaun Orsamentu Jeral Estadu (OJE) tinan 2025 tanba lakohi atu soke malu ho Primeiru Ministru Kay Rala Xanana Gusmão.
Sekretariu Jeral partidu FRETILIN, Mari Alkatiri hatete, se bainhira nia partisipa iha diskusaun orsamentu jeral iha Parlamentu Nasional mak Primeiru Ministru Kay Rala Xanana Gusmão sei la marka prezensa, tanba nee nia desidi la ba, nunee labele soke malu ho Lider Karismatiku Xanana Gusmão.
SekJer Mari Alkatiri hatoo kestaun nee ba jornalista sira bainhira remata konferensia imprensia hodi resposta pergunta jornalista sira relasiona ho SekJer nia haree kona-ba OJE 2025 iha salaun CCF Komoro, Kinta nee (07/11/2024).
SekJer dehan, atu halo diskusaun nee Partidu FRETILIN liu husi bankada mak sei partisipa, maibe eis Primeiru Ministru Mari desidi la partisipa iha diskusaun OJE neebe mak aprezenta husi IX Governu iha Parlamentu Nasional.
“Hau ba, hau nia alin Xanana sei la marka prezensa, entau diak liu husik nia ba, hau lakohi soke malu ho nia.
Mari dehan, ho orsamentu Jeral Estadu ba tinan 2025 presiza buka intende katak, gasta ho menus maibe presiza halo diak ba povu nia moris.
Oinsa SekJer nia haree oras nee daudaun Governu aprezenta OJE ho montante neebe boot, ida nee futuru sei akontese krize finanseiru ka lae? Hatan ba kestaun nee Mari dehan, iha rai balun neebe nia konhese diak agora krize boot, tanba mal Governasaun no mal jestaun.
“Timor rasik lao ba ida nee, hau dehan ami besi tua sira nee ami mak monu derepente se deit buat ruma mamuk nee mak dehan hau hakarak Xanana monu agora lae, laos kontinua ukun maibe ami sei iha funsaun, maibe funasaun diak liu mak tenke haraik aan oituan tenke rona ema seluk, tenke para ho diskriminasaun, tenke para ho odio vingansa para funsaun nee majistratura influensia,” katak nia.
Nia dehan, labele hanoin memori nee mak sai istoria, memoria nee importante maibe laos memoria nee mak halo istoria, maibe memoria nee servisu koletivu hamutuk ho povu nee mak istoria.
“Hau nunka halo konferensia imprensa ida iha periodu debate OJE, hau hakarak halo debate ba deit iha neeba, maibe hau halo ida nee tanba hau preokupadu tebes ho futuru rai ida nee nia, se hotu-hotu la preokupa ho ida nee, entaun rai nee sei tama rai koak,” katak nia.
SekJer rasik mos deklara katak, OJE 2025 nee sei benefisia deit grupu oinsa ita identifika ida nee, hatan ba kestaun nee Mari dehan nee iha estatistika nee iha, no husu ba ekonomista sira.
Nia hatutan, kresimentu ekonomiku brutu ka la brutu, produtu nasional brutu ka la brutu nee estatistika nee importante, maibe intermus hateke ba povu bainhira too oras inan aman fo hahan ba oan maibe laiha hahan, no bainhira mak husik labarik faan sasan esmola iha estrada.
Nia haktuir tan katak, ezekusaun OJE 2024 rezultadu ladun diak, agora mak sira halo diak, tanba delegasaun ida Portugal nain 60 kedas nain 9 mak halo servisu no nain 50 resin ba halo kompras deit nee saida.
Nia mos ezije ba PM Xanana atu halo balansu relasiona ho 20 milhões gasta nee nia rezultadu iha neebe.
(eme)
