DILI, STLTIMORLESTE.com – Eis Primeiru Ministru atual Sekretariu Jeral Partidu FRETILIN, Mari Alkatiri hatete, nesesariu sosa kareta ba deputadu sira hodi halo fiskalizasaun, se sae biskleta mak halo fiskalizasaun bele sosa ba sira.
Sekretariu Jeral Partidu FRETILIN, Mari Alkatiri hatoo kestaun nee ba jornalista sira bainhira remata hatoo mensajen loron referendum 30 Agostu iha nia knaar fatin Farol, Kuarta nee (27/08/2025).
Nia hatete, sosa kareta nee hodi halo fiskalizasaun, duke membru Governu troka kareta la para.
“Hau hakarak hatete ba jornalista sira, hau despeza mos hau la apoiu fatin ida mais hau lakohi konfundi ida despeza ho objetivu halo servisu ho sira ida neebe osan tama bolsu nee la hanesan, ema koalia nee tama iha sira nia narativa, agora dehan deputadu 65 nee mak aat liu iha mundu maibe ministru sira troka kareta dala hira, hau nia kareta ofisial tinan 17 ona, uluk hanesan Primeiru Ministru mos hau lao ho ida nee,” katak Eis PM Mari.
Entaun tuir Eis Primeiru Ministru nesesariu duni sosa kareta ba deputadu sira hodi halo fiskalizasaun ka oinsa? Hatan ba kestaun nee Eis PM Mari dehan, se sae bisikleta ba halo fiskalizasaun bele sosa bisikleta ba sira.
“Se dehan sae bisikleta ba halo fiskalizasaun entaun sosa bisikleta deit ba sira, ka sae kuda karik, ba halo fiskalizasaun ka sira lalika halo fiskalizasaun, se la halo fiskalizasaun saida mak sira lori mai plenaria para dehan saida mak los no saida mak sala, parlamentu tenke define lo-loos kareta nee, jestaun nee atu halo nusa, nee mak importante, ita laos hanesan Australia ema too deputadu nia la presiza ona kareta estadu nia, ita iha nee deputadu veteranus sira, ema balun uluk tama kadeia mos deputadu hotu depois hakilar la para, hau ema ida tama kadeia tau deputadu nee susar, liu-liu tama kadeia tanba oho ema,” katak Eis PM Mari.
Haree kada tinan sosa kareta ba reprezentante povu iha uma fukun Parlamentu Nasional, maibe realidade sira latun terenu hodi la halo fiskalizasaun? Oinsa Sekretariu Jeral Partidu nia haree ba ida nee? Hatan ba kestaun nee Mari dehan, se sosa kareta latun halo fiskalizasaun nee oin seluk.
“Nee oin seluk, nee depende ba jestaun parlamentu ninia, hau laos deputadu, hau tun liu sira dala barak, sira dehan lalika tun demais tanba hau presiza ita boot, lae, hau tun fila hau forte liu,” katak nia.
Aleinde nee deputadu sira mos lamenta ho asesor sira neebe simu salariu boot, oinsa fundador RDTL nia hanoin mos ba ida nee? hatan ba kestaun nee Mari dehan, asesor nee laos advogadu maibe asesor nee fo nia apaser nia informasaun ba xefe, lei nee hanesan nee, ida nee bele halo.
“Asesor iha nee lae, nia Xefe dehan hakarak halo entaun nia halo opiniaun naran naran deit mak nia Xefe, bele halo nee mensenariu nee ema sira bee simu osan para oho ema,” katak nia.
(eme)
