AMBENO, STLTIMORLESTE.com – Eis Primeiru Ministru (PM) no Eis Prezidente Autoridade Rejiaun Administrativa Espesial Oekusi Ambeno (RAEOA), Mari Bin Amude Alkatiri observa progresu servisu infraestrutura iha Oekusi seidauk iha mudansa, tanba la iha infraestrutura foun neebe halo husi autoridade foun, Rogerio Tiago de Fatima Lobato.
“Hau la haree dezenvolvimentu no la haree infraestrutura lao oinsa, saida mak hau husik hela, sei iha nee hela, buat foun hau la haree. Hau lao no observa ona, hau haree laiha mudansa ida, karik hau nia matan malahok ona karik mak la haree buat foun iha Oekusi, liu-liu ba infraestrutura foun,” dehan Mari Bin Amude Alkatiri ba jornalista sira, bainhira atualiza kartaun eleitoral ba sistema biometriku iha edifisiu Sekretariadu Tekniku Administrasaun Eleitoral (STAE) Oekusi, Sesta (22/11/2024).
Konstituisaun Republika Demokratika TimorLeste, artigu 5 kona-ba Desentralizasaun no artigu 71 sobre Organizasaun Administrativa no atu implementa artigu sira nee, Governu aprova tiha ona lei numeru 3/2014, loron 18 fulanJunu 2014, hetan promulgasaun husi Prezidente Republika konaba hamosu Rejiaun Administrativa Espesial ba Oekusi Ambeno no estabelese Zona Espesial Ekonomia Sosial Merkadu Timor Leste (ZEESM-TL).
Atu implementa lei nee, Governu no Estadu hili Mari Alkatiri hanesan Prezidente ba RAEOA no ZEESM-TL no iha tempu hanesan halo transferensia poder no devolusaun kompetensia atu lidera no dezenvolve RAEOA no ZEESM-TL husi parte fizika, hodi habelar kualidade vida no beinestar komunidade Oekusi Ambeno nian.
Iha inisiu kriasaun lei nee, Governu sentral hahu aloka Orsamentu Jeral Estadu (OJE) ba Oekusi hamutuk Milhaun US$ 600 ital no ezekuta ona Milhaun US$ 400 ital hodi konstrui mega projetu sira iha Oekusi ba setor infraestrutura sira hanesan Alargamentu estrada Pakote I husi Fronteira Sakato ba Mota Noefefan, Alargamentu estrada pakote II husi Kapital Oekusi ba Tono, harii Infraestrutura Aeroportu internasional Rota do Sandalo, ponte Noefefan, Sentral Eletrisidade iha Sakato, Klinika Kurasaun iha Santa Rosa Oekusi inklui harii rezidensia autoridade sira iha Fulolo.
Intensaun nee, Governu Timor Leste hakarak atu hasai povu Oekusi husi kiak no mukit, tanba Oekusi hanesan rai enclave, antes sai rejiaun espesial, neebe hahu hanesan distritu ida neebe kiak no izoladu liu atu asesu ba kapital nasaun Timor Leste iha Dili.
“Uluk, hau mak hahu hanesan fundador, biar agora Prezidente Autoridade RAEOA dala haat ona, maibe fundador ida deit iha mandatu dahuluk hanesan Primeiru Ministru no Primeiru Prezidente Autoridade, tanba nee hau la koalia tan ba ema seluk, saida mak sira halo, hau la koalia, sei ita bele halo balansu hamutuk hau sei koalia, Oekusi-Ambeno nuudar hau nia uma rasik no hela fatin, maske sobu hau nia uma iha Fulolo, maibe Oekusi-Ambeno nafatin iha hau nia fuan no laran,” nia dehan.
Eis PM no EiS PA-RAEOA konsidera, Relasiona ho nia partisipasaun iha komemorasaun Loron Proklamasaun Independensia iha 28 Novembru, nafatin partisipa la presiza hetan konvite.
“Hau la persiza ema mak konvida hau atu mai partisipa 28 Novembru. Hau mai Oekusi tanba haunia uma rasik. Tuir ita nia kultura, uma nain ema la konvida. Uluk, hau mai Oecusse ho Xanana, mai liu husi lia nain Oekusi hotu. Hau la mai mesak, entaun Oekusi hau nia uma mos, biar sobu haunia uma iha Fulolo, maibe nee simbolika deit, uma iha fuan nee laiha ema atu sobu”, nia afirma.
RAEOA moris iha loron 18 fulanJunu 2014, lidera dahuluk husi Mari Alkatiri hanesan Prezidente Autoridade RAEOA, mandatu daruak mak Jose Luis Guterres, datoluk mak Oekusi oan, Arsenio Paixão Bano no mandatu dahaat nee mak Rogerio Tiago Lobato.
(jos)
