DILI, STLTIMORLESTE.com – Relasiona ho selebrasaun loron FALINTIL ba dala 50 iha 20 Agostu nee, Sekretariu Jeral Partidu FRETILIN, Mari Alkatiri rekonhese dezenvolvimentu iha instituisaun FALINTIL Forsa Defeza Timor Leste (F-FDTL) lao.
Eis Primeiru Ministru atual Sekretariu Jeral Partidu FRETILIN, Mari Alkatiri hatoo kestaun nee ba jornalista sira iha Farol, Tersa nee (19/08/2025).
Nia hatete, nia rekonhese dezenvolvimentu iha instituisaun F-FDTL lao.
“Hau rekonhese katak iha dezenvolvimentu mais mai husi Forsa Gerilheira atu sai forsa regular nee esperiensia fatin hotu hotu nia susar tebes, displina gerilheira defende ba Komando. Komandante dehan ba oho entaun ba oho, displina instituisaun forsa regular defende ba instituisaun filozofia instituisaun nia nee, dala ruma lori tempu hau rona katak barak atu reforma ona,” katak Alkatiri.
Se membru F-FDTL neebe idade atu reforma mak hanoin katak, sira nia uma lisan mak FRETILIN, odamatan FRETILIN nakloke.
“Sira hanoin sira nia uma lisan mak FRETILIN, odamatan nakloke, mais tempu demokrasia bele buka dalan seluk, se hanoin uma lisan mak FRETILIN odamatan nakloke,” katak Mari.
Iha biban nee nia mos hatoo mensajen katak, formasaun agora ba sira nee regular maibe valor patriota tenke iha nafatin.
“Valor patriota mak nafatin iha, nee atu dehan saida, F-FDTL ita la harii para atu kontra povu maibe atu proteje povu, polisia ita la harii para atu halo apresaun ba povu maibe proteje povu, maibe defende politika ema ida ukun nee nia,” katak Mari.
Nia hatutan, dehan se uza forsa no polisia kontra fali ema kiak sira ida nee mak Mari la konkorda, nee halai dook ona husi valores no prinsipiu uluk funu nia.
(eme)
