DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, Deputadu husi Bankada FRETILIN halo intervensaun iha Tasi-Tolu la baku ema no la halo eviksaun, tanba nee Sekretáriu Estadu Asuntu Toponímia no Organizasaun Urbana (SEATOU) hakarak halo politika kontra, FRETILIN Preparadu atu responde.
Sekretariu Jeral Partidu FRETILIN, Mari Alkatiri hatoo kestaun nee ba jornalista sira iha nia knaar fatin Farol, Kuarta nee (07/05/2025).
Noa hatete, Partidu FRETILIN preparadu atu responde bainhira SEATOU iha politika kontra Deputadu husi Bankada FRETILIN liga ho intervensaun neebe halo iha Tasi-Tolu.
“Deputadu ba halo interven nee la baku ema ida, la halo eviksaun, nein ema ida atu keixa, keixa ba se, SEATOU hakarak halo politika kontra FRETILIN mos ami prepara,” dehan Sekretariu Jeral Partidu FRETILIN.
Sekretariu Jeral Partidu FRETILIN hatete, Governu liu husi SEATOU servisu laiha planu.
“Servisu laiha planu, laiha politika, balun kalan toba mehi ba vizita fatin ida gosta tiha fatin nee ou gosta ema ruma iha neeba haruka halo estrada bobot, no Sekretariu Estadu kumpri too agora nunka fo kulpa ba Sekretariu Estadu, hau dehan husi leten mak sala, servisu ida ordenamentu urbanu merkadu nee primeiru presiza ordenamentu ho nia tarjetu nee saida, segundu tenke iha planu para povu tomak hatene,” katak Alkatiri.
Nia hatete, uluk nia Primeiru Governu halo planu atu hadia Dili aproveita tanba uma barak hetan sunu Primeiru Ministru atual rasik mak diak ba Mari dehan servisu ho planu nee atraza dezenvolvimentu husik povu halo tuir nia hakarak.
“Para durante 24 anos laiha liberdade ita husik, fo tiha liberdade ba povu ita laiha planu no politika halo deit projetu bobot tanba saida? Tanba projetu fiziku bobot nee projetu ida loke dalan ba ita atu tau folin aas liu se mak manan boot liu tama tan broker iha klaran, leten kraik, entau projetu nee sai karun tebes no kualidade laiha, liu-liu ninia impkatu sosial nee negativu, nee mak ita haree too agora,” katak nia.
Mari dehan, nia iha ona dadus kona-ba estrada nee folin hira, empreza ida neebe mak halo; se mak iha broker, Mari iha ona dadus.
“Hau sei koalia, hau husu deit hotu-hotu kuidadu ho ida nee, tanba osan nee povu nia, laos uza hariku aan no riku matak deit,” katak Mari.
Iha loron Tersa (07/05/2025) mosu dezentendimentu entre Deputadu husi Bankada FRETILIN Ho SEATOU, tanba Deputadu ba halo intervensaun bainhira SEATOU dezloka komunidade neebe hetan eviksaun hela iha karantina Tasi-Tolu ba iha idak-idak nia munisipiu.
Ho intervensaun nee Sekretariu Estadu Assuntu Toponomia no organizasaun Urbana, Grmano Santa Brites Dias hatete, nia la sastifas ho intervensaun husi Deputadu husi Bankada FRETILIN neebe impede ninia atividade iha karantina Tasi-Tolu, tanba nee nia sei hatoo keixa ba iha Ministeriu Publiku.
(eme)
