AMBENO, STLTIMORLESTE.com – Kazu violensia domestika akontese iha Padiae parte Banoko, Suku Cunha, Postu Administrativa Espesial Oekusi-Ambeno (RAEOA), rezulta vitima ho inisial AME sofre kanek todan iha ninia kakorok, hirus matan no mata fukun inklui ulun, neebe taa husi ninia kaben rasik ho inisial RDC, iha RAEOA.
Kronolojia akontesimentu nee konta husi Antania Elu nuudar AME nia bin rasik ba STL iha Hospital Referal Oecusse (HRO), Kuarta (12/03/2025) hatete, vitima AME, iha tuku 7:30 dadersan, prepara hela matabisu ba ninia katuas oan ho oan sira atu matabisu, tanba deit vitima kuu derok masin atu lori ba fatin servisu hodi nunee han meudia iha ninia officer iha NGO ida iha Bairu Oesono, derrepente nia laen hasee dehan, loron-loron tenke kuu derok masin ba kantor atu fo han mane see iha neeba.
Ho hasee malu ida nee, hamosu haksesuk malu iha uma laran tanba vitima halo autodefeza hodi responde katak, nia mak atu han laos fo han mane seluk, entaun suspeitu ho emosional foti ai sunu baku ba vitima nia ulun, nunee lapuas foti katana taa vitima iha ninia kakorok kanek todan, taa tan iha vitima nia matan fukun leten no ulun hodi sofre raan suli barak no desmaia kedan iha tuku 8:30, iha Bairru Banoko.
Ho akontesimentu nee, suspeitu sente tauk tanba ema hobur nia, entaun nia sente trauma, tenta halai ses husi fatin akontesimentu nee no komunidade sira neebe hela besik iha fatin akontesimentu komunika kedan ba parte ambulansia Hospital Referal Oekusi no evakua direitamente vitima mai Hospital Oekusi, hodi hetan primeiru sucorus.
Iha fatin hanesan, Diretor Ezekutivu Hospital Referal Oekusi, Manuel da Cunha informa katak, iha loron Kuarta tuku 8:20, sira simu pasiente ida husi Padiae ho kanek todan iha parte Kakorok, ulun no matan fukun leten, kanek lubuk ida iha ulun.
“Hau nuudar Diretor Ezekutivu Hospital Referal Oekusi atu klarifika kona-ba ita nia pasiente ida iha Padiae, Ambulansia mobiliza pasiente nee too iha HRO tuku 8:20, kazu nee mai husi Padiae Central, problema violensia domestika, vitima hetan taa husi nia laen, kanek hira kedan, kanek iha kakorok, ulun, hirus matan, iha matan fukun nomos iha ninia liman,” dehan Diretor HRO, Manuel da Cunha.
Kondisaun pasiente mai too iha HRO ho kondisaun Shock, mediku sira husi salaun emerjensia foti kedan asaun emerjensia, tau kedan soru ka infus, depois mobiliza kedan vitima nee ba salaun operasaun.
“Iha salaun operasaun, ita nia mediku nain tolu mak fo asistensia ba ita nia pasiente nee, tantu husi sizurjiano, ortopedia nomos asistensia jeral ninian, uza intubasaun no kondisaun ita nia pasiente nee sei iha observasaun nia laran husi salaun sirusia salaun feto nian iha HRO. Sim, ita nia pasiente nee sofre todan tanba taa makaas iha pasiente ninia kakorok, pasiente mai ho kondisaun Shock, maibe husi parte sizurjiano, ortopedia nomos asistensia jeral iha kedan HRO neebe foti kedan medida hodi atende ita nia pasiente nee ho lalais hodi suku pasiente nia kanek no daudaun iha hela akompanhamentu no baixa iha HRO,” dehan nia.
Responde kona-ba pasiente sei lori ba Dili tanba hetan kanek todan, Diretor Ezekutivu nee dehan, informasaun iha katak, pasiente sei la lori ba Dili, tanba ohin iha salaun operasaun konsege atende pasiente lao ho diak no hakmatek husi sizurjiano, ortopedia nomos anistensia jeral, sira hein katak pasiente sei rekopera iha loron hirak tuir mai ba oin.
“Problema nia fukun ami parte HRO la hatene, maibe infelizmente ami husi parte hospital sempre prontu iha 24 oras nia laran, hodi atende ita nia pasiente ka ita nia kliente sira neebe mak mai iha hospital, ho kazu saida deit, ita prontu atu atende,” haktuir nia.
Bainhira STL ba konfirma ho Komando Polisia Nasional Timor Lorosae (PNTL) Rejional Oekusi kona-ba kazu nee, dehan prosesu investigasaun sei lao hela, neebe aban Kinta (ohin-Red) mak foin bele fo sai, tanba suspeitu mos asegura ona iha Sela PNTL Rejional Oekusi hodi submete ba prosesu investigasaun, tanba nee parte PNTL seidauk fornese informasaun kona-ba kazu nee.
(jos)
