DILI, STLTIMORLESTE.com – Uza media hodi trata no tolok inklui ameasa feto husi media sosial, nee mos Violensia Bazeia ba Jeneru.
Tuir Feto Potensial, Maria Amaral katak, oras nee dadaun Governu liu husi Sekretaria Estadu ba Igualdade halo kompanha makaas, oinsa prevene ba Violensia Bazeia ba Jeneru liu kampanha 16 kontra feto no labarik feto, Violensia Bazeia ba Jeneru nee laos baku iha oin nee deit, maibe tolok feto ameasa husi media sosial nemos Violensia Bazeia ba Jeneru.
“Hanesan mos esplikasaun husi Governu liu husi Sekretaria Estadu ba Igualdade klaru ona katak, tolok no ameasa feto husi media sosial nee Violensia Bazeia ba Jeneru, ida nee presiza halo sosializasaun makaas liu tan nunee redus ameasa tolok feto iha media sosial,” dehan Maria Amaral ba STl, iha nia knaar fatin, Kaikoli, Dili, Kinta (04/12/2025).
Nia hatete, violensia domestika nee dala barak akontese iha Sosiedade nia leet babain Sosiedade konsidera bebeik katak, nee problema feen laen ninia no bikan kanuru mak tarutu lolos nee krime publiku.
Tanba nee sosializasaun nee presiza lao nafatin laos iha nasional deit, maibe too iha Munisipiu sira nunee bele muda ema nia mentalidade.
Nunee mos Sekretariu Estadu ba Igualdade (SEI), hamutuk ho parseru kontinua halo kompanha 16 violensia Bazeia ba Jeneru.
Tema kampana loron 16 ativismu kontra violensia hasoru feto no labarik-feto iha 2025 “Hamutuk Hasae Konsiensia Literasia Dijital no Online seguru ba Feto no Labarik-Feto iha Diversidade hotu” no nuudar tema importante bazeia ba situasaun realidade neebe mak ohin loron feto no labarik-feto sira hasoru iha sosiedade nia leet.
SEI Elvina, Sousa Carvalho hatete, violensia bazeia ba jeneru laos deit akontese iha uma ka dalan. Bele akontese mos iha whatsApp, facebook no rede sosial sira seluk.
“Violensia dijital neebe bazeia ba jeneru (VDBJ) akontese bainhira ema uza teknolojia atu ameasa, tolok, kontrolu, ka halo asediu seksual ba ema seluk tanba vítima nia jeneru,” dehan nia.
Jornalista: Emerenciana
Editora: Carme Ximenes
