DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial CC, neebe komete krime Roubu.
Tuir akuzasaun katak, iha loron 17/09/2022, lezadu AS ho lezada JP ba pasear iha Dolok oan Kristu Rei nia kotuk hodi selebra lezada nia aniversariu.
Too iha fatin neeba, lezadu sira tur hodi konversa sobre sira nain rua ninia relasaun domin kuaze oras 4 nia laran.
Hotu tiha lezadu hamriik dudu motor atu sira nain rua fila ba uma, maibe derepente deit arguidu kaer katana ida too ba husu sira nain rua katak “imi halo saida iha nee? Maibe sira hatan dehan” ami la halo buat ruma”.
Maibe arguidu kontinua husu ba sira katak, imi hatene ka lae iha fatin nee iha ona tara bandu, maibe lezadu hatan katak tara bandu nee ba ema hotu ka ba ami nain rua deit.
Nunee, arguidu hateten ba sira atu lalika husu tan, too ameasa no haruka sira atu fo osan US$ 500, serveja kaixa 1 no karau 1, maibe lezadu sira hatan katak sira estudantes be laiha osan.
Tanba nee mak arguidu se katana ba lezadu hodi ameasa no husu sira entrega sira nia telefone. Tanba tauk lezadu nain rua mos entrega duni sira nia telefone (Samsung A71, kor mutin ho folin US$ 400 no iphone 6 ba arguidu.
Tuir fali arguidu hasai tiha xavi motor nian husi lezadu nia liman no husu fali ba sira katak hakarak fila ka lae, tanba nee mak lezadu mos ho tauk dehan o hakarak saida deit ami bele fo, importante ami nain rua bele fila ba uma.
Tanba nee mak arguidu mos entrega fila fali xavi motor nian ba sira, no hameno ba sira katak, bainhira fila fali ba iha fatin neeba karik tenke lori osan hodi fo ba nia (arguidu), maibe lalika lori ema barak. No para iha estrada ninin fo sinal apita hodi nunee arguidu hatene.
Bainhira arguidu fo fali xavi motor nian, sira nain rua mos fila kedas, maibe ba hatoo kedas keixa iha eskudra Polisia, depois mak sira ho Polisia ba fali kedas iha fatin refere hodi hein no buka arguidu, maibe la hetan.
Mezmu nune la kleur deit Polisia iha Postu Hera nian lori arguidu ba entrega iha Polisia neebe akompanha lezadu sira.
Iha altura neeba arguidu hatais kamiza no kalsa kor metan hotu, taka ulun metin ho hena too kakorok no taka oin ho maskara kor metan.
Iha loron 17/10/2022, iha PCIC nia oin, halo rekonhesimentu ba arguidu, nune lezadu sira konfirma katak arguidu mak ida nee duni.
Konsekuensia direita no nesesariamente husi arguidu ninia hahalok nee halo lezadu nain rua tauk hodi entrega sira ninia telemovel A71 ida no iphone 6 ida ba arguidu nuudar garantia ba vida foin arguidu fo fali xavi motor nian, nunee lezadu nain rua mos bele sai husi fatin neeba.
Arguidu hakarak ho intensaun, kaer katana ida ba ameasa no halo tauk lezadu sira, husu osan, karau no tua (serveja), maibe tanba lezadu sira laiha, nunee nia ameasa hodi foti telefone rua husi lezadu sira nia posse.
Ho nunee, arguidu nuudar autor material ho forma konsumadu, hodi pratika krime Roubu neebe previstu no punidu tuir artigu 253 husi Kodigu Penal.
Hatan ba akuzasaun nee arguidu deklara katak, momentu neeba arguidu la hasoru lezadu nain rua iha Dolok Oan nia kotuk.
Arguidu deklara, iha loron 17 fulan Setembru arguidu ba iha Dolok Oan, Hera, hodi tesi ai lori mai faan no fila mai uma iha tuku 5 loraik, depois iha kalan arguidu kontinua ho nia primu ba iha Dolok oan hodi kasa manu fuik.
Arguidu deklara, depois kasa hotu tiha arguidu ho nia primu fila mai uma iha oras tuku 12 kalan, iha dalan arguidu ho nia primu hasoru Polisia iha dalan, hapara arguidu ho nia primu.
Depois Polisia bolu vitima hodi husu ba vitima katak, ema ida ameasa hadau sasan no osan mak nee ka laos, no vitima hatan ba Polisia sira katak, la los ema ida ameasa hadau telefone no osan nee, isin boot hamrik alturas.
Arguidu deklara, maske rona tiha ida nee maibe Polisia kontinua la fiar, hodi tula arguidu lori mai iha Polisia nia fatin.
Arguidu nega la konhese lezadu nain rua, la ameasa foti lezadu nia telefone, arguidu rekonhese ba beibeik iha Dolok Oan nia kotuk, tanba beibeik ona ba tesi ai iha neeba lori mai faan, maibe laos ba halo tauk ema.
Tribunal konfirma ba iha sasin Zelia Siqueira hanesan arguidu nia kaben deklara katak, iha loron 17 fulan Setembru sasin iha uma no arguidu ba tesi ai iha Hera, ba dader no fila mai uma loraik, no iha kalan arguidu ho fali nia primu ba kasa manu fuik iha Hera.
Sasin deklara, kona-ba saida mak akontese dehan arguidu ameasa ema foti telefone no osan, ida nee sasin la hatene, sasin hatene mak Polisia kaer arguidu.
Sasin Fransisco Marcal deklara katak, momentu neeba sasin fila husi servisu fatin Hera no haree arguidu iha dalan mak tula arguidu fila mai uma. Depois kalan sasin ho arguidu ba kasa manu fuik, fila mai Polisia foin kaer arguidu, maibe kaer kona-ba saida sasin la hatene. No depois mak sasin rona fali husi ema seluk katak, Polisia kaer tanba dehan arguidu hadau ema nia telefone no osan, maibe sasin la haree ho matan.
Rona tiha arguidu no sasin sira, Tribunal husu atu tama kedan ba iha alegasaun.
Iha alegasaun nee Prokurador Bartolomeo de Araujo deklara katak, arguidu nega ba faktus neebe iha, tanba vitima hateten katak, ema neebe foti sasan isin boot no alturas.
Prokurador deklara, sasin sira la haree kona-ba saida mak akontese, maibe arguidu nia deklarasaun iha PSIK katak, arguidu mak halo duni asaun nee. Tanba nee MP konklui katak, arguidu mak halo aktu ida nee, husu Tribunal atu kondena arguidu pena prizaun tinan 3 suspende tinan 3.
Enkuantu husi parte defeza nian, Zermano Barros deklara katak, arguidu laos ema neebe halo asaun nee no lezadu neebe hanesan vitima la sai hanesan sasin atu mai reforsa faktus neebe iha, tanba nee defeza husu Tribunal atu absolve arguidu husi kazu nee.
Rona tiha alegasaun, Tribunal adia ba loron 02 fulan Fevereru oras tuku 5 loraik, hodi tama ba iha desizaun.
Audensia julgamentu nee prezide husi Juiz Koletivu, Jumiati Freitas, Jose Gonsalves, Juiz estajiadu nain ida, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Jermano.
(ter)
