BAUKAU, STLTIMORLESTE.com – Vitima AMM husi Suku Makadiki, Postu Administrativu Uatulari, Munisipiu Vikeke, hetan sona iha Suku Bukoli, Postu Baukau Vila, Munisipiu Baukau.
Kazu refere akontese iha loron 12 Outubru 2024, tuku 03:00 loraik, bainhira vitima hamutuk ho nia maluk nain 3 seluk faan hela sasan, hanesan basia, sikra, kurtina, hena meza no seluk tan, neebe tuir dalan kiik (tama sai bairu) iha area Suku Bukoli nian, nunee vitima AMM hakilar basia basia, maibe derepente sidadaun ida ho isin molik tenta ameasa vitima nia kolega ida inisial J liu husi kaer faru hasai liafuan mal no atu baku mate, maibe la konsege baku, tanba vitima sira tenta sees aan husi pesoal refere.
Bainhira vitima sira too tiha estrada nasional diresaun Dili-Baukau area Bukoli nian, pesoal refere tenta hamutuk tan ho maluk nain ida ho motor tuir vitima sira hodi konsege ameasa tan ba dala 2 nian no aumenta tan sidadaun balun, nunee vitima nain 4 halai fahe malu, maibe sidadaun nain 2 neebe ho motor tenta duni tuir deit AMM hodi halo agresaun fiziku ba AMM dahuluk iha area igreja Bukoli nian oin.
Hafoin sidadaun nain 2 halo tiha agresaun fiziku, AMM tenta halai ba uma ida iha igreja Bukoli nian oin buka salva husi uma nain, maibe uma nee mamuk, tanba laiha ema ida hela.
“Iha uma nee nia oin mak sira lori kroat sona hau nia kotuk dala 3, hau monu sira sama tan hau nia kotuk, ida nee mak todan,” informasaun nee hatoo husi vitma AMM ba STL hafoin vitima marka prezensa iha edifisiu Polisia Eskuadra Postu Baukau Vila, Domingu (13/10/2024).
AMM sublina, ba kazu refere parte vitima sira la hatene motivu, tanba nuudar ema faan nain mak lao ain hodi tama sai bairu atu buka moris no nunka halo problema ho sidadaun sira iha Suku refere, maibe derepente hetan baku.
Nia fundamenta, autor prinsipal ba kazu refere, vitima AMM konhese no hatene nia hela fatin, maibe naran mak la hatene, tanba autor nee rasik mak halo ameasa dala 2 no sona AMM dala 3 iha parte kabaas los neebe akompanha husi nia maluk nain ida.
Ligadu asuntu nee, STL tenta konfirma Komandante Polisia Eskuadra Postu Baukau Vila, maibe laiha fatin atu fo komentariu, tanba loron Domingu.
(EST 2)
