DILI, STLTIMORLESTE.com – Amu Armando Labetubun, SVD halo reflesaun paskua no bensaun Nossa Senhora Guadalupe nuudar mahein ba Instituisaun STL Corp.
Antes hahu reflesaun, Chief Officer Officer (CEO) STL Corp, Salvador J.X. Soares hatoo benvindu no agradesimentu wain ba Amu Armando Labetubun, SVD neebe iha disponibilidade tempu mai fo reflesaun paskua ba familia boot Instituisaun STL Corp iha tempu kuarezma, nunee mos fo bensaun ba estatua Guadalupe neebe sai protetor ba Instituisaun Media STL Corp.
“Hau hamutuk ho familia boot Instituisaun Media STL Corp, hatoo agradese no obrigadu wain ba Amu Armando Labetubun, SVD neebe ohin hamutuk ho ami STL iha tempu kuarezma, fo reflesaun paskua ba ami funsionaru STL Corp, aumezmu tempu fo bensaun ba estatua Nossa Senhora Guadalupe nuudar mahein instituisaun Media STL Corp,” dehan CEO STL Corp, Salvador J.X. Soares iha salaun Bisnis STL Osindo Surikmas, Dili, Kuarta (09/04/2025).
Iha reflesaun nee, Amu Armando Labetubun, SVD lori reflesaun husi evanjelhu São Lucas neebe haklaken kona-ba Maria no Elisabeth simu lia tatoli husi Anju Gabriel.
“Ita agradese ba Maromak nia domin neebe fiel, neebe ita simu nafatin grasa no bensaun barak neebe ita simu gratuitamente husi Maromak no ita agradese ba Maromak neebe fo prezente nafatin ho ita. Ohin ita hamutuk, husu haraik bensaun ba estatua Nossa Senhora Guadalupe, neebe sai uza nuudar ferramenta espiritual, hodi hasae ita nia orasan hodi hetan espiritual iha servisu fatin,” dehan Amu Armando.
Nia haktuir tan kata, moris diak tenke involve aan iha devosaun espiritual, ida mak reza hamutuk ho Nain Feto Guadalupe, ba lealdade no obediensia ba Maromak, liu husi obediensia, konfiansa no obediensia tomak ba Maromak ba instituisaun STL Corp.
“Iha tempu kuarezma nian, Evanjelhu São Lucas aprezenta mai ita istoria Maria no Isabel nian, no Maria nia knananuk hahi nian. Pontu importante rua iha nee mak saudasaun neebe Maria simu liu husi Anju Gabriel, tuir mai ita uza too agora, nuudar ita nia devosaun ida ba Inan Maria, mak orasaun Ave Maria, nakonu ho Grasa, Maromak hamutuk ho o. Mensajen ba ita, husi Media Suara Timor Lorosae hanesan sinal salvasaun ba povu tomak nasaun Timor Leste (TL), neebe lian sai buat diak, nuudar Anju Gabriel nuudar sentru Maromak nian, lori notisia diak. Mai ita lori kumprimentu ksolok nian, kumprimentu moris nian ba umanidade tomak, liu-liu kolega sira neebe servisu iha Instituisaun Media STL Corp, hatutan povu nia lian laek sira ba ema hotu,” afirma Amu.
Nia haktuir tan katak, ho Nain Feto, fortalesimentu Maromak nian, neebe tau matan ba kiik sira neebe haluha sira, maibe STL midia fo lian ba sosiedade ida neebe laiha lian ba ema seluk.
“Hamutuk ho Inan Maria, ita prepara ba paskua, ita nia fortalesimentu iha tempu jejun nian no iha loron balun tan ita sei tama iha Domingu Ramos nian, ezemplu inan Maria, primeiru ita reza hamutuk ho Inan Maria ba ita nia peregrinasaun ba paskua, liu husi jejun konvida ita atu hakribi ita nia salan ba Maromak. Mai ita reza hamutuk ho Inan Maria, hodi husu protesaun ba ita hotu nia servisu, nuudar ezistensia instituisaun STL Corp, neebe hatoo lian povu ba governu no nia sidadaun tomak, nuudar ibun nabilan ba povu Timor Leste. Atu reza hamutuk ho Inan Maria Guadalupe lori naroman no bensaun ba ita hotu,” remata.
Tuir observasaun STL, hafoin fo reflesaun paskua nian, kontinua fo bensaun ba Estatua Nossa Senhora Guadalupe sai mahen ba familia boot STL Corp.
Iha Biban nee, Amu Armando Labetubun, SVD agradese ba CEO STL Corp ho estrutura hodi vizita Instituisaun Media STL Corp.
(jos)
