AMBENO, STLTIMORLESTE.com – Amu Vigariu Parokia Nossa Senhora do Rosario Oekusi, Pe. Florindu de Jesus akompanha Prezidente Konselhu Pastoral Parokia Oekusi, João Bobo, Madre Domingas Quebo. O.Carm ho sarani Kutete, sai sasin ba serimonia ofisial fo tomada de pose ba katekista foun Santa Tereziha Menino de Jesus Kutete, Juliana Taela liu husi hakneak halo juramentu no asina karta tomada de pose iha Kapela Kutete, Suku Kutete, Postu Administrativu Pantemakassar, Rejiaun Administrativa Espesial Oekusi-Ambeno.
Tuir Amu Vigariu Parokia Nossa Senhora do Rosario Oekusi, Pe. Florindo de Jesus dehan, ohin hakerek iha istoria Timor Leste (TL) sai membru Association of Southeast Asian nation ba dala 11 no iha Kapela Santa Terezinha menino de Jesus Kutete, fo tomada de pose ba katekista ba dala 11 neebe assume husi Feto ho naran Kompletu Juliana Taela.
“Hau lori Amo Parokia no estrutura Konselhu Pastoral Paroria Nossa Senhora do Rosario Oekusi, hatoo agradese no obrigado wain ba katekista foun Kapela Santa Terezinha do Menino de Jesus Kutete neebe hili husi sarani Kutete atu servii uma kreda, iha kapela Izoladu Kutete. Sai nuudar katekista ita nia dever maka simu orientasaun husi Parokia no hatutan ba sarani sira no katekista rona preokupasaun sarani sira nian hodi hatoo ba parokia. Ita sai katekista la iha salariu, maibe ita nia obra nuudar domin ba sarani no igreja hodi haklaken maromak nia liafuan,” afirma Amu Vigariu Parokia Nossa Senhora do Rosario Oecusse, Pe. Florindo de Jesus iha Kapela Santa Terezinha Menino de Jesus Kutete, Domingu (26/11/2025).
Iha biban nee, nia husu ba sarani Kutete oan sira, atu kolabora hamutuk ho Katekista foun neebe maka ohin sarani sira sai sasin iha serimonia tomada de Pose liu husi misa Eukaristia no prezensa husi prezidente Konselhu Pastoral Parokia Nossa Senhora do Rosario Oekusi, João Bobo ho estrutura.
Nia dehan, durante nee kuaze fulan 3 ou 4, la realiza misa Eukaristia iha Kutete tanba, lakon kontaktu ho Katekista sesante ho naran Kasimiro Queno neebe aman maromak bolu hikas ba nia kadunan santo, maibe agradese ba sarani sira iha Kutete, konsege halao eleisaun no eskolha inan feto ida ho naran Juliana Taela hodi assume fali responsabilidade nuudar katekista foun Kutete.
Iha biban tomada de pose nee, Katekista foun Kutete, Juliana Taela hakneak iha altar santo no sarani kapela Santa Terezinha Menino de Jesus oin halo juramentu ba maromak atu servi sarani sira iha Kapela nee tuir eskritura maromak nian.
“Hau Jura ba maromak katak, hahu ohin ba oin, hau sei halao hau nia knaar nuudar katekista iha Kapela Santa Terezinha Menino de Jesus hodi serbi sarani sira iha uma kreda, hodi reja kredo.
Hau fiar Maromak mesak ida deit, Aman Kbiit-tomak Nain, Mahalo lalehan no rai, buat hotu be bele hare no labele hare. Hau fiar Nai ida deit, Jezus Kristu Maromak Oan-mane Mesak, moris nanis husi Aman molok tempu hahu. Maromak husi Maromak, Naroman husi Naroman .Maromak loos, husi Maromak lo-loos, Aman hakous, la halo Nia, nia aan ida deit ho Aman. Buat hotu halo ona hodi Nia. Tan ita ema, atu soi ita, Nia tun ona husi Lalehan. Halo nia aan ba ema, Hodi Espiritu Santu, Nia hola isin iha Virjem Maria nia knotak, halo nia aan ba ema. Tan mos ba ita, ema hedi Nia ba Kruz, iha Ponsio Pilatus nia ukun, terus, mate tiha, ema hakoi Nia. Liu loron tolu, tuir Eskritura, Nia hahu moris hias; hiit aan ba Lalehan, hein aan iha Aman nia sorin kwana. Nia sei mai fali ho gloria, atu tesi-lia ba ema moris no ba ema mate, nia ukun sei rohan laek. Hau fiar Espiritu Santu, Nai bre haraik moris, mai husi Aman no Oan, ema ha Nai, haliban hamutuk ho Aman no Oan. Nia hae lia tun liu husi Profeta sira. Hau fiar Kreda ida mesak, Santa, Katolika, Apostolika. Hau haklaken batismu ida deit atu kasu salan. Hau hein moris-hias mate siran, no moris ida be sei mai, Amen,” Juliana Taela reza kredo.
Hafoin ida nee, hamrik sae iha altar santo no asina termo de Pose nuudar katekista foun no aprova husi Amo Vigario Parokia Nossa Senhora do Rosario Oekusi, Pe. Florindo de Jesus no asinunsia ba publiku liu husi termo de Pose, remata sarani sira basa liman no kontinua ho misa eukariastia.
Iha biban nee, Intelektual Kutete oan, Jose Alexandre Bana agradese ba Amo Vigariu Parokia Nossa Senhora do Rosario Oekusi, neebe ohin tomada de pose ona katekista foun Kutete hodi kontinua organiza sarani sira iha atividades igreja nian iha kada Domingu nomos loron boot Natal, Paskua no eventu seluk tan neebe maka organiza husi Igreja.
“Hau hatoo agradese ba Amo Vigariu Parokia Nossa Senhora do Rosario Oekusi, ho prezidennte Konselhu Pastoral sai sasin ba serimonia tomada de Pose, katekista foun Kapela Kutete,” afirma nia.
Iha biban nee, Lia nain Kutete, Jose Eli hatoo hatoo mos obrigado wain ba Amo Parokia Oecusse liu husi Amo Vigariu ho Prezidente Konselhu Pastoral Parokia, Joao Bobo ohin realiza tomada de Pose ba katekista foun Kutete ba dala 11.
“Ami nia kapela Santa Terezinha nee ejiste kedan iha tempu Portugal nia ukun, tanba nee Katekista dahuluk maka Mestre Paulo Obe, katekista segundu Mestre Joao de Jesus Kolo, katekista da tolu, Paulus Elu, katekista da haat, Pedro Suni, tama iha tempu indonezia nia ukun katekista da lima, Arnaldo Elu, katekista da neen, Carlos Bana too TL ukun rasik aan, katekista da hitu Francisco Queno, katekista da walu, Edmundo Quebo, katekista da sia, Jorge Quebo, katekista ba dala 10, Casimiro Queno, no katekista atual ba dala 11 asume fali husi Juliana Taela,” dehan nia.
Ohin tomada de pose ona katekista foun ba dala 11 nee, lori sarani no katuas lia nain sira iha Kapela Kutete, agradese ba Amu Parokia liu husi Amu Vigario Parokia Nossa Senhora do Rosario Oekusi, neebe ohin fo ona tomada de pose ba katekista foun nee.
Jornalista: Joseph Koa
Editor: Joseph Koa
