DILI, STLTIMORLESTE.com – Deputada Bankada FRETILIN, Maria Anabela Sávio sadik Primeiru Ministru (PM), Kay Rala Xanana Gusmão atu responde ba publiku kona-ba kazu roo Haksolok neebe gasta osan barak, maibe roo nee seidauk mosu mai hodi fo haksolok ba povu sira.
Nia dehan, kona-ba preokupasaun roo Haksolok, kompetensia tomak iha Primeiru Ministru, Kay Rala Xanana Gusmão mak iha poder tomak atu fo resposta ba Publiku, maibe tanba saida mak too agora PM Xanana seidauk responde.
“Oportunidade ida nee hau dezafia ita boot PM Xanana, tenke fo resposta se ita boot mak loos entaun fo resposta iha okaziaun ida nee, maibe ita boot la fo resposta signifika ita boot mak autor ba kazu roo Haksolok”, hatete Deputada Maria Anabela iha diskusaun Proposta Orsamentu Jeral Estadu (OJE) 2025, iha PN, Dili, Kinta (07/11/2024).
Deputada nee dehan, daudaun nee kazu roo Haksolok, publiku hein hela resposta husi PM Xanana.
Entretantu Deputada husi Bankada CNRT, Carminda Carlota hatete, kona-ba kazu roo Haksolok neebe durante nee sai preokupasaun publiku, tanba gasta osan povu nian neebe boot.
Tuir nia, kona-ba kazu roo Haksolok nee laos Primeiru Ministru, Xanana mak autor, laos PM Xanana mak gasta osan povu nian.
(gui)
