VIKEKE, STLTIMORLESTE.com – Diretora Nasionál Promosaun, Prevensaun no Komunikasaun iha INCSIDA, Angelica soares da Costa Oliveira hatete, kuandu ema neebe moris ho virus HIV pozitivu tenke hemu aimoruk Antri Retro Viral (ARV) iha nia moris tomak.
“Sei hau pozitivu HIV, pesoal saude sira prefere liu hau ba halo tratamentu ida ho aimoruk ARV,” hatete Diretora Nasionál Promosaun, Prevensaun no Komunikasaun iha INCSIDA, Angelica soares da Costa Oliveira ba jornalista sira wainhira halao sosializasaun iha Suku Luka, Postu Administrativu Vikeke, Munisípiu Vikeke, Kinta nee (31/07/2025).
Nia dehan, kuandu laiha moras komplikasaun TB ou moras seluk mak foin hetan pozitivu HIV bele halo tratamentu no hemu aimoruk, maibe ho komplikadu ho moras TB tenke mos halo tratamentu HIV.
“Sei ita laiha moras komplikadu ruma, entaun sira haruka hau ba halo tratamentu no hemu aimoruk ida ho naran ARV nee, no aimoruk nee la faan iha Klinika Privadu nomos la naran fo ba ema arbiru, ema neebe mak pozitivu HIV mak foin hemu ARV nee,” nia deklara.
Nia informa, pozitivu ona HIV tenke hemu ARV loron-loron nomos hemu iha vida tomak, atu nunee hamate virus nee iha ema nia isin.
“Aimoruk ARV tenke hemu loron-loron iha vida tomak, karik hau sei klosan hela mak hau tes raan pozitivu HIV, hau tenke hemu ARV nee tuir Doutor sira haruka, no iha futuru hau hakarak harii uma kain, hau nia virus nee sei la hadaet ba hau nia kaben, tanba antes hau kaben hau hemu rutin los, tanba aimoruk nee halo virus nee labele implika aan, entaun labele hadaet ba hw nia parseiru no la hadaet ba hau oan,” nia hatutan.
Iha fatin hanesan, Koordenadór Programa HIV-SIDA iha Munisípiu Vikeke, Joãojinho Viana esplika, Munisípiu Vikeke sufisiente hodi fo tratamentu ba ema neebe ho moras HIV-SIDA.
“Aimoruk ARV ami rai iha fatin tratamentu ba HIV, aimoruk ami tau hotu iha neeba, kondom tau hotu iha neeba, aimoruk hepatitis aimoruk iha, sifilis aimoruk iha, HIV aimoruk iha,” nia informa.
Nia hatutan, aimoruk pesoal saude sira rai iha fatin tratamentu ba ba HIV, sira la rai iha Sentru Saude Vikeke nomos la rai iha Postu Saude sira.
“Ami la rai iha Postu Saude sira, maibe ami rai iha fatin tratamentu ba HIV nian, karik pasiente nee pozitivu HIV, ami ho konsilor lori aimoruk ba pasiente nian fatin,” nia afirma.
(jen)
