DILI, STLTIMORLESTE.com – Xefe bankada FRETILIN, Deputadu Aniceto Guterres hatete, kareta neebe nia uza oras nee daudaun kondisaun diak hela, no FRETILIN mos hatama proposta husu atu kansela sosa kareta.
Xefe Bankada FRETILIN Aniceto Guterres hatoo kestaun nee ba jornalista bainhira partisipa konferensia imprensa iha salaun CCF Komoro, Kinta (11/09/2025).
Aniceto hatete, asuntu neebe agora viral sosa kareta ba deputadu parlamentu nasional, kuandu nia assume kargu nuudar Prezidente parlamentu iha 2020 nia simu situasaun kareta parlamentu nia. Iha kareta operasional nomos iha kareta deputadu nia. Kareta deputadu nia 65 tuir numeru deputadu no kareta viatura 30 mai husi husi terseira lejislatura nee kareta prado, no ho kareta 35 kareta Pajero neebe sosa iha kinta lejislatura Pajero sport.
Kondisaun kareta, ida 30 mai husi terseira lejislatura nee, tanba idade aumenta barak mak kondisaun aat bebeik tenke hadia. I afeita mos ba kustu manutensaun, depois ida kareta pajero sport nee sosa iha kinta lejistura bainhira assume kargu Prezidente parlamentu nia idade uza seidauk too tinan 2 kompeltu, maibe kareta ida nee mos barak mak aat parese kondisaun kareta hola mai balun kondisaun ladiak ona.
“Tanba hau detekta buat barak iha kompra de viatuara kareta Pajero ida nee, hau enkamina halo partisipasaun ida ba KAK momentu nee atu halo investigasaun konaba kompras viatuara iha kinta lejislatura nia, pajero 35 too agora Komisariu KAK ida uluk sira maioria mak hili agora Ministru Justisa Sergio Hornai, agora dadaun iha komisariu foun ida neebe sira mak hili rasik mos too agora hau nia keisa nee sira seidauk halo investigasaun ida konaba kompra viatura kinta lejistura pajero 35 nee. Kondisaun kareta enjeral hanesan nee tanba nee iha OJE 2023 nia hau aprezenta proposta ida para sosa kareta opesional laos kareta ba deputadu, 10 ou 15 hau ladun fiksa numeru maibe latoo 20 para atu subtitui kareta sira neebe aat bebeik nunee funsaun deputadu halo fiskalizasaun la interompe, entau hatama iha orsamentu maibe oposizaun momentu nee mak CNRT sira kontra mobiliza manifestasaun ida iha UNTL, Reitor Unpaz mak dirize,” katak Depurtadu nee.
Nia hatete, momentu ho manifestasaun organiza husi Reitor UNPAZ, tanba nee retira sosa kareta operasional depois osan ida sosa kareta nee Eis PR Parlamentu halo fali proposta para destina fali US$ 1 milhaun ba igreja Lospalos neebe agora komesa dadaun ona konstrusaun akaba sosa kareta operasional.
Deputadu nee hatete, atu koalia konaba nesesidade nee, nesesidade iha maibe ezezeradu. Orsamentu sosa kareta nee ezejeradu tanba kareta balun sei diak, maibe sira la interese sira hakarak sosa hotu kareta foun, kareta balun sei diak lolos labele sosa bele uza.
Nia hatutan, orsamentu atu sosa kareta ba deputadu sira aprova ona iha fulan Novembru 2024, maske momentu nee FRETILIN hatoo proposta kansela sosa kareta maibe bankada oposizaun uza maioria vota kontra.
Nunee mos Prezidente Partidu FRETILIN Francisco Guterres Lu Olo hatete, esplikasaun husi Xefe Bankada FRETILIN esplika klaru ona, katak Bankada FRETILIN iha parlamentu bainhira parlamentu aprezenta OJE 2025 nia proposta husi FRETILIN kontra.
“Deputadu nee sidadaun neebe babain maibe eleitu demokratikamente liu husi partidu politiko,” katak Prezidente Partidu.
Deputadu neebe mai husi partidu ba tuur iha parlamentu nasional, atu halo ezersisiu funsaun orgaun soberania atu halo lei, fiskalizasaun no halo desizaun politiko, deputadu sira ba atu reprezenta povu ezerse nia funsaun, no reprezenta povu la individualmente maibe reprezenta povu liu husi orgaun kolejial parlamentu nia.
Jornalista: Emerenciana Pinto
Editora: Domingas Gomes
