DILI, STLTIMORLESTE.com – Autoridade Nasional Minerais (ANM) hamutuk ho Governu Australia liu husi Departament of Industry Science Energy and Resources (DISER), ohin halo asina akordu ida kona-ba kooperasaun no kolaborasaun iha parte setor Mineiru nian.
Asina akordu ida nee estabelese ho ninia objetivu, atu estabelese servisu hamutuk entre parte Governu Timor Leste no Governu Australia, liu-liu hodi foka ba asuntu sira neebe ligadu ho setor Mineiru nian.
“Ohin ita asina akordu ida nee entre Governu Australia no Timor Leste liu husi instituisaun rua nee, Australia nian mak Departament of Industry, Science Energy and Resources (DISER) hamutuk ho Autoridade Nasional Minerais no parte Governu Timor Leste nia liu husi Ministeriu Petroleu Rekursus Minerais asina akordu ida kona-ba kooperasaun no kolaborasaun iha setor mineiru ninian,” dehan Prezidente ANM, Rafael Danilson Magno de Araujo ba jornalista sira iha City 8 Fomentu, Dili, Kinta nee (10/04/2025).
Nunee husi akordu nee estabelese mos ekipa sekretariadu neebe kompostu husi Governu Australia no Ekipa Timor nian, no ekipa tekniku sira nee mak sei sai ekipa ida neebe sei jere hotu ba kualker programa neebe mak parte rua aseita ona.
Prezidente ANM mos hatoo agradese ba Governu Australia liu husi DISER neebe ho laran luak tebes hakarak oferese ona fundus balu, para bele organiza ekipa sekretariadu nee bele funsiona nia servisu diak liu tan, para programa neebe parte rua aseita bele implementa ho diak.
“Fundu iha tinan ida nee Governu Australia aprova US$ 150 mil para atu jere deit servisu sekretariadu ninian, ita sei haree ba oin atu lao oinsa, karik Governu Timor mos presiza tau fundus maibe ba tinan ida ne’e husi DISER mak fo suporta barak, karik ba oin mak sei iha tan Programa ruma parte rua sei diskuti tan oinsa para bele prienxe tan fundu ida nee,” katak Prezidente ANM nee.
Iha fatin hanesan, Deputy Head of Mission, Edward Wilkinson informa, sente orgulhu tanba bele hetan oportunidade ida nee hodi servisu hamutuk ho Governu Timor Leste hodi fahe esperiensia.
“Governu Australia orgulhu hetan oportunidade balun atu fahe esperiensia, no ami nia esperiensia iha Australia no rai seluk ami orgulhu atu servisu hamutuk ho Timor Leste liu-liu iha organizasaun importante sira ami sei kontinua servisu iha tempu naruk atu harii kapasidade iha setor importante sira,” dehan nia.
(EST 2)
