BAUKAU, STLTIMORLESTE.com – Autoridade Nasional Minerais (AMN) provizoriu simu ona rezultadu peskiza ba minerais metalikus no laos metalikus husi kompanhia peskizador sira iha territoriu nasional, neebe iha bloku balu hatudu rezultadu diak.
Prezidente ANM, Rafael D. M. de Araujo esplika, iha tinan 2023, Governu liu husi Kompanhia Internasional sira halo peskiza ba rekursu minerais metalikus no laos metalikus iha territoriu nasional hamutuk bloku 48, neebe daudaun kompanhia peskizador sira relata ona rezultadu preliminariu ba ANM hamutuk 26, neebe bloku minerais balu iha rezultadu pozitivu atu halo esplorasaun.
“Bloku liu 20 neebe hau mensiona lisensa ita atribui iha tinan kotuk, agora daudaun peskiza sira lao hela iha terenu (Nia rezultadu) konforme relatoriu preliminariu neebe ita simu empreza balu hatoo iha indikasaun minerais diak iha ita nia rai,” hatete Rafael D. M. de Araujo ba STL iha sentru konvensoens Vila Antiga, Baukau, Kuarta (12/03/2025).
Nia sublina, bloku 26 neebe daudaun ANM simu ona rezultadu preliminariu husi kompanhia sira, antes nee halo peskiza ba rikusoin sira hanesan maganez, osan mean, minarai kobre inklui minarai kromitu.
Nia fundamenta, rezultadu provizoriu neebe ANM simu, rekursu hirak neebe parte kompanhia peskizador sira detekta iha Munisipiu Lautem inklui Baukau.
“Atu dehan bainhira mak halo esplorasaun nee depende ba rezultadu peskiza nee rasik, se dehan tinan 2 entaun ita esplora ona, maibe dehan tinan 4 entaun tinan 4, neebe depende ba peskiza mak termina,” Rafael akresenta.
Prezidente ANM nee deklara, mezmu ANM simu ona rezultadu husi kompanhia peskizador, maibe atu marka data esplorasaun seidauk, tanba daudaun parte kompanhia sei kontinua hela halo peskiza too durasaun tempu tinan 4.
Nia informa, bainhira peskiza remata no halo esplorasaun, sei fo vantajen ba Estadu Timor Leste, tanba bele kria kampu trabalhu ba Timoroan inklui aumenta ekonomia nasaun iha futuru neebe diak liu, tanba bele aumenta fundu petroleum.
Rafael argumenta, atu garante nafatin rikusoin Timor nian iha rai maran, ANM kontinua akompanha Kompanhia Internasional sira neebe daudaun iha Timor halo peskiza ba rekursus minerais metalikus no laos metalikus, nunee bele tau matan diak liu tan ba rikusoin sira tuir lei kodigu mineiru haruka.
Entretantu Kompanhia Internasional no Nasional neebe daudaun halo peskiza ba rekursus minerais metalikus no laos metalikus iha territoriu nasional, husi Nasaun Australia kompanhia 4, Indonezia 1, Singapura 2, Inklui komapanhia lokal balu.
(EST 1)
