DILI, STLTIMORLESTE.com – Antes atu tama ba iha ezame nasional, Ministeriu Edukasaun (ME) sei apoiu konsesaun eskolar ba Eskola Sekundariu Jeral Públiku no Privadu sira.
Diretor Nasional Ensinu Sekundariu iha ME, Benjamin Gomes da Cruz Fernandes hatete, konsesaun nee seidauk atribui, maibe ninia prosesu nee lao hela. Sekuandu relatoriu hotu, entaun hahu atribui ona konsesaun nee ba eskola sira.
“Bainhira relatoriu hotu ami hahu atribui ona konsesaun nee ba ita nian eskola sekundariu jeral públiku no privadu sira, antes halao ezame nasional. Nee ami tenke atribui hotu ona osan ida nee ba eskola sira. Ita nian eskola privadu iha 6, no eskola públiku iha 54, hamutuk 60,” tenik Beenjamin ba STL, Kinta (18/09/2025).
Tuir nia, ME garante fulan ida nee nian laran sei atribui konsesaun ida nee ba eskola sira. Bele dehan, iha tempu badak nian laran ME sei fo apoiu konsesaun ba eskola sekundariu sira, nee ba periode tolu no hat nian.
Nia hatutan, montante konsesaun ba eskola públiku US$ 423,110, benifisiariu ba estudantes mak 42, 311 no ba eskola privadu nian maka US$ 19, 900 benifisiariu ba estudantes 3,980.
Jornalista: Jacinta Sequeira
Editora: Domingas Gomes
