DILI, STLTIMORLESTE.com – Antonio Maria Conceição Moniz Mali eleitu ba Prezidente Konselhu Imprensa (KI) mandatu datolu ba tinan haat, periodu 2025 too 2029.
Prezidente Sesante KI, Otelio Ote hateten, eleisaun refere durante nee lao tuir prosesu estatutu Konselhu Imprensa (KI) nian neebe define ona iha artigu 23.
“Hanesan Ita hatene Konselhu Imprensa ohin organiza eleisaun ba Prezidente Konselhu Imprensa ba periodu 2025 too 2029, ida nee prosesu ida neebe halao tuir lei no mandatu husi Estatutu Konselhu Imprensa artigu 23 husi prosesu neebe ami halo tiha ona, desde dadersan too meudia ami halo prosesu ida nee demokratiku teb-tebes, sekretu, no ikus mai ami rezulta ona Prezidente Konselhu Imprensa foun, neebe sei lidera Konselhu Imprensa periodu 2025-2029 mak senhor Antonio Maria Conceição Moniz Mali,” dehan Prezidente Sesante KI, Otelio Ote iha sala enkontru KI, Kintal Bot, Dili, Kuarta (30/04/2025).
Nia hatutan,prosesu tuir mai sei haruka karta ofisial ba Parlamentu Nasional, hodi hein rezultadu ba tomada pose.
“Ami sei haruka karta ofisial ida ba Parlamentu Nasional, konaba rezultadu elesaun Prezidente Konselhu Imprensa depois sei publika ba Jornal Republika,ikus ita sei Iha ajenda husi Parlamentu Nasional konaba tempu atu halo tomada pose bainhira Prezidente eleitu ho nia membru sira nain haat,sira nain lima Konselhu Imprensa atual remata mos ninia mandatu ba periodu 2021-2025” dehan nia.
Iha fatin hanesan Antonio Maria Conceição Moniz Mali hateten,nia parte hakarak agradese no obrigadu ba komisaun organizadora neebe durante nee organiza ona eleisaun husi inisiu too remata.
Nia prontu atu tane aas resposabilidade neebe maka nia asume,hamutuk ho nia membru sira hodi tau matan liu tan ba instituisaun media sira iha rai laran atu divulga informasaun kredivel ba publiku.
“Hau hakarak hatoo hau nia agradesimentu,obrigadu barak ba komisaun organizadora neebe maka realiza ona eleisaun ida nee hodi hili hau sai Prezidente Konselhu Imprensa Timor-Leste nian, agradese mos ba Jornalista sira liu-liu asosiasaun Jornalista neebe maka mobiliza ona sira nia membru sira hodi vota ba hau,nee todan ida hanesan babain,responsabilidade ida neebe hau tenke tula iha hau nia kabas ba durante tinan haat nia laran Ida nee laos papel deit,maibe ida nee hanesan komprimisu ida,hamutuk ho kolega sira seluk ami tane aas,responsabilidade media nia, no lalaok media nia ba instituisaun sira neebe maka divulaga informasaun neebe kredivel ba publiku,” hatete Prezidente Eleitu KI nee.
Nia afirma, nia parte sei halo esforsu hodi luta ba Liberdade Imprensa, hodi tutur no tane aas norma sira iha mundu jornalizmu nia.
(est/04)
